कायम मुकायम प्रधानन्यायाधीश दिपककुमार कार्कीले बुधबार दिउँसो आकस्मिक रूपमा न्यायपरिषदको बैठक डाकेका छन् । २ करोड घुस लेनदेनको डीलसम्बन्धी डीलको अडियो सार्वजनिक भएपछि न्यायपरिषदको आकस्मिक बैठक बोलाइएको छ ।

सिभिल सेभिङ एन्ड क्रेडिट को–अपरेटिभ लिमिटेडका सञ्चालक इच्छाराज तामाङलाई धरौटीमा रिहा गर्नका लागि १० करोड रुपैयाँ धरौटीमा रिहा गर्ने र त्यसबापत २ करोड घुस लिएर बाँडफाँड गर्ने विषयमा काठमाडौं जिल्ला अदालतका न्यायाधीश राजकुमार कोइराला र वकिल रुद्र पोखरेलबीच भएको संवाद सार्वजनिक भएको थियो ।

ठगी मुद्दामा पक्राउ परेका सिभिल सहकारीका सञ्चालक तामाङलाई थुनछेक बहसपछि १० करोड धरौटी लिएर रिहा गर्ने र २ करोड रुपैयाँ घुस लिएर बाँडफाँड गर्ने विषयमा कुराकानी भएको अडियो बाहिरिए पछि कारवाही गर्ने विषयमा छलफल गर्न न्याय परिषद्को बैठक बोलाइएको हो । बैठक दिउँसो १ बजे बस्नेछ ।