भक्तपुरपोस्ट संवाददाता भक्तपुर, २७ कार्तिक २०७९
भक्तपुर, २७ कार्तिक २०७९ काठमाडौंबाट विभिन्न गन्तव्यमा भोट हाल्न जानेहरुको सङ्ख्या बढेसंगै टिकट बुकिङ बढेको छ । प्रतिनिधिसभा र प्रदेशसभा सदस्य निर्वाचन आउन एक हप्ता समय बाँकी हुँदा सवारी साधान बुकिङ गर्नेको संख्या बढेको हो ।
निर्वाचनमा मतदाता गाउँसम्म लैजान बस बुकिङका लागि राजनीतिक दलका उम्मेदवार, नेता तथा कार्यकताएले धमाधम बुकिङ गरेको नेपाल यातायात व्यवसाय राष्ट्रिय महासङ्घका अध्यक्ष विजयबहादुर स्वाँरले जानकारी दिए ।
“मतदातालाई गाउँमा भोट हाल्न लैजाने भन्दै विभिन्न पार्टीका नेता तथा उम्मेदवारले व्यवसायी र महासङ्घमा फोन गरेर बस बुकिङ गरिरहनुभएको छ”,उनले भने ।
महासङ्घले गत हप्ता निर्वाचनमा खटिएका नेपाल प्रहरी तथा सशस्त्र प्रहरीका लागि दुई सय ८५ बस उपलब्ध गराएको थियो । रासस