भक्तपुर, १८ मङ्सिर २०७९ नेकपा माओवादी केन्द्रको पदाधिकारी बैठक आज बस्दै छ । पदाधिकारी बैठक आइतबार दिउँसो २ बजे केन्द्रीय कार्यालय पेरिसडाँडाँमा बोलाएको हो ।
मंसिर ४ गते सम्पन्न प्रतिनिधिसभा तथा प्रदेशसभा निर्वाचनको समीक्षा र नयाँ सरकार गठनबारे छलफल गर्न हिजो शनिवार पनि माओवादी केन्द्रको पदाधिकारी बैठक बसेको थियो । शनिबार बसेको बैठकले आफ्नो नेतृत्वमा सरकार गठन गर्ने विषयमा सबै विकल्पमा खुला राख्ने निर्णय गरेको प्रवक्ता कृष्णबहादुर महराले बताए ।
बैठकले सत्ता गठबन्धनलाई नछोड्ने तर सरकार निर्माणका सन्दर्भमा अन्य दलसँग पनि परामर्श गर्ने निर्णय गरेको उनले बताए ।
माओवादी केन्द्रले पार्टी अध्यक्ष दाहाल प्रचण्डलाई प्रधानमन्त्री बनाउन सत्तारुढ गठबन्धनमा दबाब पुग्ने निष्कर्षसहित सरकार गठनका लागि एमालेसहितका अन्य विभिन्न दलहरूसँगको विकल्पलाई पनि खुला राख्ने नीति रणनीति लिएको उनको भनाइ छ ।
आजको बैठकमा चुनावी परिणाम र सरकार निर्माणमा केन्द्रित छलफल हुने प्रवक्ता महराले जनाएका छन् ।