नेपाल ललितकला प्रज्ञा–प्रतिष्ठानले ‘समृद्ध नेपाल, सुखी नेपाल’ शीर्षकमा चित्रकला तथा कलाका विविध आयाम, तथ्य र अभ्याससम्बन्धी पुस्तक प्रदर्शनी सुरु गरेको छ । सो प्रदर्शनीको उद्घाटन शनिबार पूर्वप्रधानमन्त्री केपी शर्मा ओलीले गरेका थिए ।
सोही अवसरमा पुर्वप्रमले कलाकार गणेश जीसीको ‘अरनिको एसिया : एक प्रस्तावना’ शीर्षकको पुस्तक लोकार्पण गरेका थिए । कार्यक्रममा पुस्तकका लेखक जीसीले ऐतिहासिक कालमै नेपाललाई कलाको पेगोडा शैलीमार्फत चिनाउने कलाकार अरनिको नेपालका मात्र विभूति नभई एसियाकै एक गौरवमय सम्पदा भएको बताएका छन् ।कलाकार अरनिकोको सन्दर्भमा बढीभन्दा बढी खोज, अनुसन्धान तथा पुस्तक लेखिनुपर्छ भनेर पुस्तक तयार गरेको जानकारी उनले दिए ।
प्रदर्शनीमा किरण गुरुङ, पुष्प आलेमगर, सुनिल पाण्डे, पकबहादुर थापा, उद्धव रिमाल, हरिओम मेहतालगायतका कलाकारका चित्र र प्रतिष्ठानका विविध विभागमार्फत विगत चार वर्षमा प्रकाशित कलासम्बन्धी विभिन्न पुस्तक प्रदर्शनी आयोजना गरिएको छ ।