भक्तपुर, ५ पुस २०७९ बैतडीमा शिक्षक, विद्यार्थी र स्थानीयवासी आन्दोलित भएका छन् । बैतडीको पाटनमा मृत फेला परेका शिक्षक धनबहादुर विष्टको हत्या भएको भन्दै दोषी पत्ता लगाउन माग गर्दै स्थानीयवासी र विद्यार्थीहरू आन्दोलित भएका हुन् ।
घटनाको निष्पक्ष छानबिन गरेर दोषी पक्राउको माग गर्दै उनीहरुले दशरथचन्द मार्ग अवरुद्ध गरेका गरेका छन् । मङ्गलबार बिहानैदेखि बैतडीको पाटनका विभिन्न ठाउँमा टायर बालेर प्रदर्शन भएपछि दशरथचन्द राजमार्ग अवरुद्ध भएको हो ।
गएको शनिबार बैतडीको श्रीकृष्ण माविको छात्रबास पछाडि भिरालो ठाउँमा शिक्षक विष्टको शव फेला परेको थियो । शवको पोस्टमार्टम गरिए पनि आफन्तले शव बुझेका छैनन् । मृतकका परिवारले दोषीको पहिचान नभएसम्म शव नबुझ्ने अडान लिएका छन् । मृत्यु हुनु एकदिन अगाडि (शुक्रबार) शिक्षक विष्ट कृष्ण माविकै शिक्षक र अन्यसँग पार्टीमा सहभागी भएका बताइएको छ ।
दोषी पत्ता नलागेपछी विद्यालय बन्द
शिक्षक मृत फेला परेको चार दिनसम्म पनि दोषी पत्ता नलागेपछी पाटन नगरस्तरीय नौ वटा शिक्षक सङ्गठनले नगरभित्रका विद्यालय बन्द गरेर शिक्षक र विद्यार्थी आन्दोलनमा उत्रिएका छन् । घटनाको सत्यतथ्य छानबिन गर्न एक दिन विद्यालय बन्द गरिएको शिक्षक डीबी महराले बताए ।
उनले भने, “३४ वर्षसम्म शिक्षण सेवा गर्नु भएका शिक्षक धनबहादुर विष्टको मृत्युले शिक्षा जगतमा ठूलो क्षति भएको छ । दोषी पत्ता नागेसम्म हामी आन्दोलनमा उत्रिन्छौँ ।”
आन्दोलनमा सहभागी हुन बैतडीको खोड्पे बजारका स्थानीयलेसमेत एक घण्टा बजार बन्द गरेर शिक्षक विष्टको न्यायका लागि प्रदर्शन गरेका छन् । सडक अवरुद्ध हुँदा लामो तथा छोटो दूरीमा चल्ने सवारी साधन बाटोमा रोकिएका छन् ।
प्रहरीले भने घटनाको अनुसन्धान भइरहेको जनाएको छ । घटनाका विषयमा सूक्ष्म अनुसन्धान भइरहेको जिल्ला प्रहरी कार्यालयका प्रवक्ता प्रहरी निरीक्षक योगेश खत्रीले जानकारी दिए । आन्दोलित पक्षसँग वार्ता गरेर अवरुद्ध सडकखण्ड सुचारु गर्ने प्रयास भइरहेको उनको भनाइ छ । गोरखापत्रको सहयोगमा