भक्तपुर, १९ फागुन २०७९ सञ्चार तथा सूचना प्रविधि मन्त्री रेखा शर्माले सञ्चार जगतले जनताको बोली बोल्नुपर्ने बताएकी छन् । प्रेस सेन्टर नेपाल सम्बद्ध पत्रकारसंग मन्त्रालयमा शुक्रवार कुराकानी गर्दै उनले सो कुरा बताएकी हुन् ।
सरकारको प्रवक्ता समेत रहेकी मन्त्री शर्माले सरकारलाई सञ्चार जगतले खबरदारी गरिराख्नुपर्ने पनि प्रष्ट पारिन । सरकारका जनपक्षीय कामबारे जनतालाई जानकारी गराइदिन र जनताको समस्याबारे सरकारलाई सूचित गर्न सञ्चार जगतको महत्व बारे उनले प्रकाश पारिन । सरकारलाई जनतासंग जोडिराख्न प्रेस सेन्टरको रचनात्मक भूमिका रहने उनले बिश्वास समेत व्यक्त गरेकी छन् ।
मन्त्री शर्माले सञ्चार र सूचना प्रविधिको क्षेत्रमा रहेका कानुनलाई संघीय लोकतान्त्रिक गणतन्त्र नेपालको मर्म अनुकूल बनाउन आफू लागिपरेको जानकारी गराइन् । सञ्चारसँगै सूचना प्रविधि क्षेत्रको व्यवस्थापन महत्वपूर्ण रहेको बताउदै जनताको प्रत्यक्ष जीवनसँग जोडिने भएकाले यसमा आवश्यक नीति र बैज्ञानिक संरचना बनाउन आफू जुटेको मन्त्री शर्माले जानकारी दिइन् । भर्खरै सरकारी वेबसाइटहरुको एकीकृत सञ्चालन र अनुगमन प्रणाली सुरु गरिएको उल्लेख गर्दै उनले साइवर सुरक्षासँग सम्बन्धित नीतिगत, कानुनी र संरचनागत विकासका लागि उच्चस्तरीय आयोग गठन गरिएको पनि जानकारी दिइन् ।
उनले परिवर्तनलाई उल्टाउन खोज्ने तत्वहरु सल्बलाइरहेका उल्लेख गर्दै तिनलाई निस्तेज पार्न र परिवर्तनलाई सस्थागत गर्न प्रेस सेन्टर नेपाल चनाखो हुनुपर्ने आवश्यकता समेत औल्याएकी थिइन् ।
उक्त अवसरमा प्रेस सेन्टर नेपालका अध्यक्ष बिष्णु सापकोटा जुगलले प्रेस सेन्टरका पत्रकार जनताका पत्रकार भएकाले सरकारका राम्रा कामको प्रचार गर्न र कमजोरीमा खबरदारी गर्न कुनै कसर बाँकी नराख्ने बताए । प्रेस तथा अभिव्यक्ति स्वतन्त्रताको रक्षा र प्रबर्द्धन गर्न प्रेस सेन्टरको सदैव सहयोग रहने प्रष्ट पार्दै अध्यक्ष सापकोटाले पत्रकारका हकहित र पेशागत सुरक्षाका लागि सरकारले ठोस योजना अघि सार्नुपर्ने प्रस्ताव गरेका छन् ।
