भक्तपुर, १९ बैशाख २०८०मकवानपुरका एक वडाध्यक्ष पक्राउ परेका छन् । मकवानपुरको थाहा नगरपालिका–७ का वडाध्यक्ष गाँजासहित पक्राउ परेका हुन् ।
प्रहरीले मकवानपुरको थाहा नगरपालिकाबाट २ सय २ किलो गाँजासहित ३ जनालाई नियन्त्रणमा लिएको छ ।
लागूऔषध नियन्त्रण ब्युरो कोटेश्वर काठमाडौं र इलाका प्रहरी कार्यालय पालुङका प्रहरी नायब निरीक्षक उमेशप्रसाद कोइरीको कमाण्डमा खटिएको संयुक्त टोलीले मकवानपुरको थाहा नगरपालिका–७ आग्रा बस्ने ७६ वर्षीय भीमबहादुर थिङ, ३९ वर्षीय शिवराज थिङ र ६७ वर्षीय इन्द्रबहादुर थिङलाई नियन्त्रणमा लिएको हो ।
शिवराज वडाध्यक्ष हुन्, भने भीमबहादुर उनका बुबा हुन् । उनीहरू तीन जनाकै घरबाट गाँजा बरामद गरिएको प्रहरीले जनाएको छ ।
भीमबहादुर थिङ र शिवराज थिङको घरबाट ३० वटा पोकामा २७ किलो ग्राम गाँजाको धुलो र इन्द्रबहादुर थिङको घरबाट १० वटा बोरामा १ सय ७५ किलो लागूऔषध गाँजा गरी २ सय २ किलो लागूऔषध गाँजा तथा त्यसको धुलोसहित उनीहरूलाई नियन्त्रणमा लिइएको हो ।
बरामद गरिएको गाँजा र नियन्त्रणमा लिइएका तीनै जनालाई इलाका प्रहरी कार्यालय पालुङ मकवानपुर ल्याइएको र कारबाहीका लागि थप अनुसन्धान भइरहेको मकवानपुर प्रहरीले जनाएको छ । राजधानी दैनिक