भक्तपुर, २१ भदौ २०८०काठमाडौं महानगरपालिका वडा न १६ का वडाध्यक्ष मुकुन्द रिजालको निधन भएको छ । डेंगु संक्रमणपछि उपचारमा रहेका रिजालको निधन भएको हो ।
नेपाली कांग्रेसकी नेतृ सिर्जना सिंहले सामाजिक सञ्जाल मार्फत रिजालको मृत आत्माप्रति श्रद्धाञ्जली व्यक्त गर्दै उनको निधनको पुष्टि गरेकी छन् । वडा न १६ का वडा सचिव प्रकाश खड्काले ग्राण्डी अस्पतालमा उपचारका क्रममा रिजालको निधन भएको बताए । काठमाडौं कांग्रेस क्षेत्र नं ७ का सभापति समेत रहेका रिजाल गत स्थानीय तह निर्वाचनमा ४ हजार ५ मतका साथ नेपाली कांग्रेसको तर्फबाट वडा अध्यक्षमा विजयी भएका थिए । उनले नेकपा एमालेका लक्ष्मीरत्न तुलाधरलाई पराजित गरेका थिए ।
फोहोर व्यवस्थापन लगायतका विषयमा कार्यपालिकाको पहिलो बैठकमा नै महानगर प्रमुख बालेन्द्र साहसँग उनको चर्काचर्की पनि परेको थियो । पछि प्रमुख साह रिजाललाई भेट्न उनकै निवास पुगेका थिए ।
यसैवीच, महानगरपालिकाका प्रमुख प्रशासकीय अधिकृत बसन्त अधिकारीले नगर कार्यपालिका अन्तर्गत पूर्वाधार समितिका संयोजक समेत रहेका वडाध्यक्ष रिजालको पार्थिव शरीर श्रद्धाञ्जलीका लागि विहान ११ बजेदेखि राष्ट्रिय सभा गृहमा राखिने र त्यसपछि अन्तिम संस्कारका लागि पशुपति आर्यघाट लगिने जानकारी दिएका कान्तिपुर हटलाइनले जनाएको छ ।