भक्तपुर, ३ असोज २०८०सरकारले संसद्मा दर्ता गरेको विद्यालय शिक्षा विधेयकको विरोधमा हजारौं शिक्षकहरू सडकमा उत्रिएका छन् । उनीहरुले राजधानी केन्द्रित आन्दोलन शुरु गरेका हुन् ।
शिक्षकहरुको छाता संगठन नेपाल शिक्षक महासङ्घको अगुवाइमा देशभरबाट आएका शिक्षकहरू माइतीघरमा भेला भई आन्दोलनमा उत्रिएका छन् । आन्दोलनका कारण ट्राफिक व्यवस्थापन बिथोलिएको छ ।
विधेयकमा महासङ्घको विभिन्न १८ बुँदे असहमति रहेको शिक्षक नेता शंकर अधिकारीले जनाएका छन् । सरुवा, बढुवामा मनोमानी गरिएको वृत्ति बिकासको अवसर नभएको र पेशागत असुरक्षाका कारण आन्दोलन गर्न बाध्य भएको उनले बताए । त्यसका अलावा शिक्षामा लगानी वृद्धि गर्न, कक्षा १२ सम्मको पूर्ण निःशुल्क शिक्षाको व्यवस्था गर्न समेत माग गरिएको छ ।
शिक्षक र विद्यालय कर्मचारी माथि ज्यादती बन्द गर, शिक्षामा कुल बजेटको २० प्रतिशत लगानी गर, शिक्षामन्त्री राजीनामा दे, कक्षा १२ सम्मको पूर्ण निःशुल्क गर्, १० वर्षमा आवधिक बढुवाको ग्यारेन्टी गर्, राहत र उच्च मावि दरबन्दी स्वीकृत गर्, शिक्षा विधेयक संशोधन गर् लगायतका नारा लेखिएका प्लेकार्ड बोकेर प्रदर्शनकारीहरु नयाँ बानेश्वर पुगेका छन् । आन्दोलनमा भक्तपुरबाट पनि शिक्षकहरु सहभागी रहेका छन् ।