भक्तपुर, ५ असोज २०८०पूर्वराजा ज्ञानेन्द्र शाह आइतवार भक्तपुर आउने भएका छन् । दरवार स्क्वायरस्थित प्रसिद्ध तलेजु भवानी र टौमढी टोलस्थित भैरवनाथ मन्दिरको दर्शन गर्न उनी भक्तपुर आउने भएका हुन् ।
पूर्वराजाको स्वागत सत्कारका लागि राजसंस्थावादी समेत रहेका समाजसेवी अनन्तप्रसाद धौभडेलको संयोजकत्वमा एक समिति समेत गठन गरिसकिएको छ । पूर्वराजा यही असोज ७ गते भक्तपुर आउने भन्ने कुरा उनै धौभडेलले शुक्रवार रफत संचार क्लबमा संचारकर्मीलाई जानकारी गराए ।
उनले पूर्वराजाको ऐतिहासिक एवं सांस्कृतिक नगर भक्तपुरको भ्रमण वर्तमान परिस्थितिमा राजसंस्थाको महत्व र आवश्यकतालाई उजागर गर्ने समेत उल्लेख गरे ।
स्वागत समितिका सदस्यसचिव रामेश्वर थापाले जनाए अनुसार पूर्वराजाको भक्तपुर भ्रमणमा स्थानीय कला, संस्कृति झल्कने परम्परागत शैलीमा स्वागत, सत्कार गरिने भएको छ । साथै सोही दिन भक्तपुरको सल्लाघारीस्थित होटल ग्रिनल्यान्डमा पूर्वराजासँग देशको समसामयिक विषयमा सर्वसाधारण लगायत सञ्चारकर्मीहरूले अन्तरसंवाद गर्न सक्ने समेत जानकारी प्राप्त भएको छ ।