भक्तपुर, १४ असोज २०८०नेपाल कम्युनिष्ट पार्टीका महासचिव विप्लव सीले बेरोजगार उत्पादन गर्ने शिक्षा आवश्यक नरहेको बताएका छन् । मध्यपश्चिम विश्वविद्यालय सुर्खेतमा आयोजित “विद्यार्थीसँग विप्लव” विषयक अन्तरक्रिया कार्यक्रमलाई सम्वोधन गर्दै महासचिव विप्लवले नेपालको शिक्षाले बेरोजगार उत्पादन गरिरहेकाले शिक्षा नीति बदल्नुपर्नेमा जोड दिएका हुन् ।
महासचिव विप्लवले नेपालमा विद्यार्थीहरुलाई विदेश जान रोक्न सक्ने शिक्षाको बिकास हुनुपर्ने बताए । उनले आफ्नो पार्टीले नेपाललाई केही नयाँ परिवर्तन चाहेको र त्यो गर्ने इच्छाशक्ति र सामर्थ्य समेत भएकाले विद्यार्थीहरुलाई निरास नबन्न आग्रह गरे । महासचिव विप्लवले भने,“हामी यो देशका युवा विद्यार्थीहरुलाई निरास बन्न दिदैनौँ ।”
महासचिव विप्लवले शिक्षालाई उत्पादन र श्रमसँग जोड्नुपर्नेमा जोड दिए । कुनैपनि नेपालीले श्रम गर्न लाज मान्न नहुने र उत्पादनको काममा जुट्नुपर्ने उनले बताए । उनले मध्यपश्चिम विश्वविद्यालयले छोटै समयमा केही राम्रो र नमुनायोग्य काम गरेको भन्दै धन्यवाद समेत दिए ।
‘६ करोडलाई खान पुग्ने नेपालको जमिन आज साढे दुई करोड जनतालाइ समेत खान पुग्ने गरी उत्पादन भएको छैन । यो कुराको नेकपाले अन्त्य गर्न चाहन्छ । ‘ उनले भने । विदेशी हस्तक्षेप कुनैपनि बहानामा स्वीकार नहुने उनले स्पष्ट पारे ।
कार्यक्रममा मध्यपश्चिम विश्वविद्यालयका उपकुलपति डाक्टर नन्दबहादुर सिंहले विश्वविद्यालयमा राजनैतिक हस्तक्षेप हुने र राम्रो गर्न खोज्दा दबाब आउने खुलासा गर्दै विश्वविद्यालयलाई शिक्षाको मन्दिर जस्तै पवित्र संस्था बनाएर अघि बढ्नुपर्ने बताए ।
कार्यक्रममा महासचिव विप्लवलाई विश्वविद्यालयका विद्यार्थीहरुले विविध प्रश्न राखेका थिए । उपकुलपति सिंह लगायतको विश्वविद्यालय परिवारले उनको स्वागत गरेको थियोे । विश्वविद्यालय परिवारले विश्वविद्यालयले गरेका कामहरुकोबारे जानकारी गराउन इन्जिनियरिङ्ग क्याम्पस, शिक्षा, ल, एजुकेशन लगायतका फ्याकल्टिका क्याम्पसहरुको महासचिव विप्लवलाई निरिक्षण गराएको थिए ।