भक्तपुर, २६ पुस २०८०प्रेस काउन्सिल नेपालले युट्युब लाई व्यवस्थित गर्न आचारसंहिता अभिमुखीकरण शुरु गरेको छ । बिहीबार सञ्चारग्राममा विभिन्न युट्युब माध्यमका करिब ५० जना सञ्चालक तथा सम्पादकलाई बोलाएर अन्तरक्रियात्मक अभिमुखीकरण कार्यक्रम गरिएको हो ।
कार्यक्रममा प्रेस काउन्सिल नेपालका अध्यक्ष बालकृष्ण बस्नेतले युट्युबमार्फत आचारसंहिता पालना गर्दै पत्रकारिता गर्ने हो भने सञ्चारका अरु माध्यम जस्तै यसको पनि विश्वसनीयता बढ्ने बढाउदै आफूहरुले त्यस्तालाई साथ सहयोग र प्रोत्साहित गर्ने प्रष्ट पारेका छन् । कार्यक्रममा काउन्सिलका अध्यक्ष बस्नेतले ‘युट्युब र आचारसंहिता’ विषयक कार्यपत्र पनि प्रस्तुत गरेका थिए ।
कार्यक्रममा बोल्दै नेपाल पत्रकार महासंघका अध्यक्ष विपुल पोखरेलले नयाँ कुरालाई सहजै स्वीकार्न नसक्दा युट्युब मार्फत पत्रकारिताको अपेक्षित बिकास हुन नसकेको बताए । हिजो पत्रपत्रिका, रेडियो र अनलाइनले भोगेको समस्या अहिले युट्युब सञ्चालकले भोग्नु परिरहेको उनको भनाइ छ ।
सहभागी युट्युब संचालकहरुले भने आफूहरुलाई आक्षेप र अपहेलना गरी समाचारको प्रभाव कम गर्नखोज्ने कार्य भैरहेको गुनासो गरेका थिए ।