भक्तपुर, १८ जेठ २०८१क्यान्सर भन्ने बित्तिकै मानिसहरु कमजोर महसुस गर्छन् । तर, एक युवा कविले भने क्यान्सरसंग लड्न कविताकै सहारा लिएका छन् ।
वैदेशिक रोजगारीको क्रममा कुवेतमा काम गर्दा गर्दै बोनम्यारो क्यान्सर भएर स्वदेश फर्किएका कवि नवराज न्यौपानेले क्यान्सर संग लड्दै गर्दा कविताको संग्रह नै लेखेका छन् र त्यसैलाई क्यान्सरसंग लड्ने हतियार बनाएका छन् । नवराजले लेखेको कविता संग्रह ‘सपनाका लहरहरु भाग ३’ शनिबार सार्वजनिक समेत हुने भएको छ । करिव दुई वर्ष देखि क्यान्सर रोगसंग लडिरहेका कविले उपचार खर्च सहयोगार्थ उनकै कविता संग्रह सार्वजनिक गर्न लागेका हुन् ।
ललितपुरको ब्लड हस्पिटलमा उपचार गराइ रहेका नवराजको तेह्रौँ किमो भर्खरै सकिएको छ । हरेक २८ दिनमा किमो गर्नुपर्ने र यो उपचार बिधी महँगो हुने भएकाले आफ्ना कविता संग्रहहरु खरिद गरी सहयोग गर्न कविले सार्वजनिक अनुरोध गरेका छन् । नेपालकै पहिलो कविता रियालिटी शो ‘पोइट आइडल’मा समेत सहभागी भएका कवि नवराजको यस अगाडी पनि कविता संग्रह सपनाका लहरहरु भाग १ र २ प्रकाशति भइसकेका छन् भने उनका केही गीतहरू पनि रेकर्ड भएका छन्।
क्यान्सर जस्तो रोगसँग जुधिरहेका कवि नवराजको मनोबल बढाउन र उनले अस्पतालकै सैयामा लेखेको कविता संग्रह ‘सपनाका लहरहरु भाग ३’ विमोचन कार्यक्रमको प्रमुख अतिथि वागमति प्रदेशका उद्योग, पर्यटन, वन तथा वातावरण पूर्व मन्त्री अरुण नेपाल र विशेष अतिथि सुनकोशी गाँउपालिकाका अध्यक्ष टपिन्द्र प्रसाद तिमल्सीना रहने बताइएको छ ।
शान ब्याङ्केट, खहरेचोक (पेप्सीकोला)मा जेठ–१९ गते शनिवार, दिनको ४ वजे सिन्धुपाल्चोक सुनकोशी ३ का ‘क्यान्सर फाईटर’कवि नवराज न्यौपानेको उपचार खर्च सहयोगार्थ हुन लागेको यस कविता संग्रह बिमोचन कार्यक्रममा उपस्थित हुन सम्पूर्ण साहित्य प्रेमी र सहयोगी मनहरुलाई कविले अनुरोध गरेका छन् ।