भक्तपुर, ११ असार २०८१नेपाल पत्रकार महासंघको केन्द्रीय सदस्य रहेकी ललिता साहले विशेष अदालतबाट सफाई पाएकी छन् । सप्तरीबाट गोरखापत्र समाचारदाता समेत रहेकी साहले सेनेटरी प्याड खरिद सम्बन्धी मुद्दामा सफाई पाएकी हुन् ।
सप्तरीको रुपनी गाउँपालिकाले आर्थिक वर्ष ०७७/७८ मा सेनेटरी प्याड खरिद गर्दा अनियमितता भएको भन्दै गत माघमा अख्तियार दुरुपयोग अनुसन्धान आयोगले साहसमेतलाई बिपक्षी बनाइ विशेष अदालतमा मुद्दा दायर गरेको थियो ।
केन्द्रीय सदस्य साह प्रोप्राइटर रहेको लक्ष्मी ट्रेडर्स एण्ड सप्लायर्सले खुल्ला टेण्डर प्रक्रियाको माध्यमले गरेको सेनेटरी प्याड आपूर्तिलाई कर्मचारीसँग मिलेमतोमा अनियमितता गरेको अख्तियारले आरोप पत्रमा उल्लेख गरेको थियो ।
अख्तियारले साहसहित तत्कालिन प्रमुख प्रशासकीय अधिकृत अरविन्द कुमार चौधरी, सुब्बा सुजन दाहाल, लेखा अधिकृत श्याम सुन्दर यादव, शिक्षा शाखा संयोजक श्यामप्रसाद यादवलाई बिपक्षी बनाई मुद्दा दायर गरेको थियो ।
उक्त मुद्दामा विशेष अदालतले आज (मङ्गलबार) फैसला गर्दै सबैलाई सफाइ दिएको हो । विशेष अदालतका अध्यक्ष समेत रहेका न्यायाधीश टेकबहादुर कुँवर, न्यायाधीश तेजनारायणसिंह राय र न्यायधीश मुरारीबाबु श्रेष्ठको संयुक्त इजलासले साहसहित पाँचै जनालाई सफाई दिएको केन्द्रीय सदस्य साहले जानकारी दिएकी हुन् ।
साह मुद्दापछि सपरिवार भक्तपुर रही सफाईको प्रतिक्षामा थिइन् । उनको नाममा दर्ता रहेको लक्ष्मी ट्रेडर्स एण्ड सप्लायर्स उनका पतिले संचालन गर्दै आएपनि मुद्दामा जोडिन पुग्दा उनको पत्रकारिता पेशा प्रभावित बन्न पुगेको थियो । अदालतबाट सफाई पाएपछि उनले प्रसन्नता प्रकट गर्दै पुन: पत्रकारितामा क्रियाशील रहने प्रतिवद्धता प्रकट गरेकी छन् ।