भक्तपुर, २७ असार २०८१पत्रकार रोजिना थापा युवा पत्रकारिता पुरस्कारबाट पुरस्कृत भएकी छन् । युवा तथा खेलकुद मन्त्रालयले हरेक वर्ष प्रदान गर्ने सो पुरस्कारबाट यो वर्ष रोजिना पुरस्कृत भएकी हुन् ।
सर्लाही स्थायी घर भएकी रोजिना नेपाल पत्रकार महासंघ उपत्यका प्रदेश समितिकी उपाध्यक्ष एवं प्रेस सेन्टर नेपाल उपत्यका प्रदेश समितिकी महासचिव समेत हुन् ।
विभिन्न टेलीभिजनमा एक दशक भन्दा लामो पत्रकारिता यात्रा गरेकी उनी हाल देखापढी अनलाइनमा कार्यरत रहेकी छन् । उनी भक्तपुर पोस्टको सल्लाहकार समेत हुन् ।
पछिल्लो समय उद्यमको क्षेत्रमा देखिएका चुनौती, अवसर, सम्भावनाको बारेमा विषय उठान गर्दै उनी सरोकारवालालाई सचेत गराउन प्रयत्नशील छन् । यसका साथै युवाहरूले नेपालमा नै राम्रो गर्न सक्छन् र स्वदेशमै मिहिनेत गरे प्रसस्त सम्भावना छ भन्ने हौसला प्रदान गर्नेखाले सामाग्री पस्कदै आएकी छन् ।
मन्त्रालयले रोजिना सहित सुर्खेतका ललितबहादु बुढा, जुम्लाका सागर परियार र बैतडीका विनोद सिंह बिष्ट गरी चार जना पत्रकारलाई यस वर्षको युवा पत्रकारिता पुरस्कार प्रदान गरेको हो । उनीहरू सबैले ५० हजार नगद सहिद प्रमाणपत्र प्राप्त गरेका छन् ।
सो अवसरमा बोल्दै पत्रकार रोजिना थापाले कर्म गर्दै जाँदा युवा उद्यमको क्षेत्रमा सहयोग पनि भएको र पुरस्कारले थप काम गर्ने हौसला पनि मिलेको बताउँदै आफ्नो पत्रकारिता पेशाप्रति सन्तोष ब्यक्त गरेकी छन् ।