भक्तपुर, २८ असार २०८१नेमकिपाका सचिव एवं प्रतिनिधि सभाका सदस्य प्रेम सुवालले शाशक दलका नेताहरुको पटक पटक प्रधानमन्त्री बन्ने लालसाले राजनीतिक अस्थिरता आएको बताएका छन् ।
शुक्रवार प्रतिनिधिसभा बैठकमा प्रधानमन्त्री पुष्पकमल दाहाल प्रचण्डले राखेको विश्वासको मतबारे आफ्नो धारणा राख्दै सांसद सुवालले सो कुरा बताएका हुन् । पटक पटक सरकार बन्ने परिपार्टीको अन्त्य गर्नुपर्ने उनले बताए ।
एउटा पार्टीको कार्यकर्ताले अर्को पार्टीको चुनाव चिह्नमा मत हाल्न नहुने र त्यो शहिदको सपना नभएको उनको भनाइ छ ।
सबै सरकारहरूका पालामा भ्रष्टाचार नियन्त्रण र सुशासन नभएको र जनताको पक्षमा सरकारहरूले काम नगरेका उनले जिकिर गरे । बाढी, डुबान रोकथाम र पीडित जनतालाई राहत दिन नसक्नु यसैको परिणाम भएको उनले प्रष्ट पारे ।
सांसद सुवालले नयाँ सरकारले संसद्लाई प्राज्ञिक थलोको रूपमा विकास गर्नुपर्नेमा जोड दिएका छन् ।