भक्तपुर, १३ साउन २०८१नक्कली भुटानी शरणार्थी प्रकरणमा संलग्न रही फरार रहेका भनिएका बेचन झालाई पक्राउ गर्ने विशेष ब्युरोका डिआइजी मनोज केसीको सरुवा गरिएको छ । नयाँ सरकार बनेसंगै गत बुधबार गृहमन्त्री रमेश लेखकको निर्णयबाट सो सरुवा गरिएको हो ।
डिआइजी मनोज केसीलाई विशेष ब्युरोबाट समय नपुग्दै तानेर प्रहरी प्रशिक्षण प्रतिष्ठान महाराजगन्ज पठाइएको छ भने प्रतिष्ठानमा रहेका डिआइजी राजन अधिकारीलाई ब्युरोमा ल्याइएको छ ।
केसीको दुई महिना नबित्दै सरूवा गरिएको हो । केसी र अधिकारी दुबै गत जेठ ४ गते सँगै नै बढुवा सिफारिसमा परेर डिआइजी बनेका हुन ।
नक्कली भुटानी शरणार्थी प्रकरणमा फरार रहेका बिचौलिया बेचन झा र पूर्व गृहमन्त्री एवं एमाले उपाध्यक्ष रामबहादुर थापाका पुत्र प्रतीक थापालाई पक्राउ गर्न केसीको भूमिका थियो । दुवै असार १४ गते शुक्रबार पक्राउ परेका थिए ।
उनीहरु पक्राउ परेपछि त्यसको जालो समात्दै जाँदा उच्च तहमा पुग्ने भएपछि सरकार ढलेको तत्कालिन प्रधानमन्त्री प्रचण्ड एवं गृहमन्त्री रवि लामिछानेले संसदलाई जानकारी गराएका थिए । पछिल्लो घटनाले त्यसको पुस्ट्याईलाई बल पुगेको देखिन्छ ।