भक्तपुर, ३० मङ्सिर २०८१निजी तथा आवासीय विद्यालय अर्गनाइजेसन नेपाल(प्याब्सन) को सूर्यविनायक नगर समितिमा नयाँ नेतृत्व चयन भएको छ । आइतवार सम्पन्न तेस्रो अधिवेशनले नयाँ नेतृत्व निर्वाचित गरेको हो ।
सूर्यविनायक नगर प्याब्सनको तेस्रो अधिवेशनबाट अध्यक्षमा विनोद काफ्ले निर्वाचित भएका छन् । उनी रेन्बो स्कूलका संचालक एवं प्रिन्सिपल हुन् । काफ्लेको अध्यक्षतामा ७ सदस्यीय नयाँ कार्यसमिति निर्वाचित भएको छ ।
कार्यसमितिको उपाध्यक्षमा प्रेसियस स्कूलका भोला चौधरी, सचिवमा युनिक स्कूलका खुमप्रसाद शर्मा र कोषाध्यक्षमा ग्लोबलका के.वि. ङाखुसी निर्वाचित भएका निवर्तमान अध्यक्ष दिनेश मैनालीले जानकारी दिए । कार्यसमिति सदस्यहरुमा जनचेतनाका यज्ञ भट्टराई, वेदिकका दीपेन्द्र भण्डारी र विङ्सका जनार्दन अधिकारी निर्वाचित भएका उनले जनाएका छन् । सिङ्गो कार्यसमिति नै निर्विरोध निर्वाचित भएको बताइएको छ । कार्यसमितिको प्रमुख सल्लाहकारमा निवर्तमान अध्यक्ष दिनेश मैनाली र वरिष्ठ सल्लाहकारमा पूर्व अध्यक्ष सानुराजा कार्की रहेका छन् ।
अधिवेशनको उद्घाटन सत्रलाई सम्बोधन गर्दै प्याब्सनका केन्द्रीय अध्यक्ष डिके ढुङ्गानाले सक्रियताको आधारमा सूर्यविनायक प्याब्सन नगर प्याब्सनमध्ये उत्कृष्ट दशमा पर्ने भन्दै नेतृत्वको प्रशंसा गरेका थिए । उनले शिक्षामा गरिने लगानीले नै देशको दीर्घकालीन विकास हुने भएपनि सरकारले चासो नदिएको र उल्टै निजी क्षेत्रलाई निराश पार्ने काम गरिरहेको आरोप लगाए ।
अध्यक्ष ढुङ्गानाले प्याब्सनलाई सडक आन्दोलन गर्नुपर्ने स्थितिमा पुर्याउन राजनीतिक नेता भन्दा कर्मचारीको बढी हात भएको बताए । सो अवसरमा प्याब्सनका केन्द्र, प्रदेश र जिल्लाका नेताहरूले सम्बोधन गर्दै प्याब्सनबिना विद्यालय बलियो बन्न नसक्नेमा जोड दिए ।
उद्घाटन सत्रमा सूर्यविनायक प्याब्सनले सल्लाहकार र सहयोगीहरुलाई सम्मान पत्रले सम्मान गरेको थियो । नेकपा (माओवादी केन्द्र)का केन्द्रीय सदस्य डिपी ढकाल, नेकपा(एमाले) का जिल्ला अध्यक्ष वचन देउजा लगायतका नेताहरुलाई पनि सम्मानपत्रको ब्यवस्था गरिएको थियो । अधिवेशनमा सूर्यविनायक प्याब्सनमा आवद्ध २ दर्जन विद्यालयका प्रतिनिधि सम्मिलित थिए ।