काभ्रे । प्रेस सेन्टर नेपालको काभ्रेपलाञ्चोक जिल्ला शाखामा नयाँ नेतृत्व चयन भएको छ । बनेपामा सम्पन्न पाँचौं अधिवेशनबाट रामप्रसाद ढकालको नेतृत्वमा ११ सदस्यीय कार्यसमिति निर्वाचित भएको हो ।

कार्यसमितिको उपाध्यक्षमा सुरज श्रेष्ठ र महिला उपाध्यक्षमा मायालु लामा रहेका छन् । सचिवमा चित्रप्रसाद घिमिरे (हरिहर), सह सचिवमा प्रशान्त बन्जारा र समावेसी सहसचिवमा बिजय जिम्बा रहेका छन् । त्यसैगरी कोषाध्यक्षमा मोतिलाल मोक्तान निर्वाचित भएका छन् ।

सिङ्गै कार्यसमिति निर्विरोध निर्वाचित भएको निवर्तमान अध्यक्ष रोजन तामाङले जनाएका छन् । अधिवेशनमा प्रेस सेन्टर नेपालका उपाध्यक्ष एवं बागमती प्रदेश इन्चार्ज लक्ष्मण खड्का र महासचिव सन्तोष पौडेल, प्रदेश अध्यक्ष यदुनाथ गौतम लगायतको आतिथ्यता रहेको थियो ।

अधिवेशनको उद्घाटन भने पूर्व मन्त्री एवं प्रतिनिधि सभा सदस्य सूर्यमान दोङ लालध्वजले गरेका थिए । सो अवसरमा उनले देश र जनतालाई आहात गरिरहेको सरकारको भन्डाफोर गर्नुपर्नेमा जोड दिएका थिए । नेकपा(माओवादी केन्द्र)का केन्द्रीय सदस्य समेत रहेका दोङले जनपक्षीय पत्रकारिताको तागत देखाइदिन पनि आग्रह गरेका थिए। कार्यक्रममा बागमती प्रदेश सरकारका पूर्व मन्त्री एवं प्रदेश सभा सदस्य रत्नप्रसाद ढकाल लगायत जनप्रतिनिधिहरुको पनि आतिथ्यता रहेको थियो ।