भक्तपुर, १६ साउनराष्ट्रिय परीक्षा बोर्डले बिहीवार कक्षा १२ को परीक्षाफल प्रकाशन गर्ने भएको छ । परीक्षाफल प्रकाशनको प्रयोजनको लागि बिहीवार विहानै बोर्ड बैठक बोलाइएको जानकारी प्राप्त भएको छ ।
स्रोतका अनुसार विहान ७ बजे बोर्ड बैठक बोलाइएको छ । बैठक सकिए लगत्तै नतिजा सार्वजनिक हुनेछ ।
यसपटक बोर्डले निरन्तरतामा क्रम भंग गर्दै कक्षा १२ को सवै संकायको नतिजा एकैपटक सार्वजनिक गर्न लागेको समेत श्रोतले बताएको छ । यस अघि दुइ चरणमा नतिजा प्रकाशन हुदै आएको थियो ।
परीक्षा एकैपटक भए पनि पहिला बिज्ञान बिषय लिएर पढेका विद्यार्थीहरुको परीक्षाफल प्रकाशित हुने र त्यसको केहि साता पछि अन्य परीक्षार्थीहरुको परीक्षाफल प्रकाशित हुने परम्परा यस बर्षबाट तोडिने भएको हो ।
बोर्डको नयाँ परीक्षा नियन्त्रकमा कृष्ण शर्मा नियुक्त भए संगै भोली हुनलागेको परीक्षाफल प्रकाशन यस अर्थमा ऐतिहासिक समेत हुने भएको छ ।
कक्षा १२ को परीक्षामा करिव ४ लाख विद्यार्थी सहभागी छन् ।