भक्तपुरको मध्यपुर थिमि नगरपालिकाले जेष्ठ नागरिक र गर्भवती महिलाहरुको लागि नि:शुल्क वडागत स्वास्थ्य सेवा शुभारम्भ गरेको छ । प्रत्येक वडाबाट महिनाको दुईदिन प्रवाह हुनेगरी निशुल्क सेवा शुभारम्भ भएको हो ।

बिहीबार वडा नम्बर ६ मा आयोजित सेवा शुभारम्भको घोषणा कार्यक्रमलाई सम्बोधन गर्दै नगर प्रमुख सुरेन्द्र श्रेष्ठले स्वास्थ्य बीमा मार्फत ६० बर्ष भन्दा माथिका जेष्ठ नागरिक र गर्भवती महिलाहरुलाई  निशुल्क स्वास्थ्य सेवाको ब्यवस्था मिलाएको बताए ।

प्रत्येक वडामा महिनाको दुईदिन यस्तो सेवा प्रवाह हुने र यसका लागि नेपाल कोरिया मैत्री नगरपालिका अस्पतालका विशेषज्ञ चिकित्सक सहितको टोलि परिचालन गरिने उनले जानकारी गराए । “वडा स्वास्थ्य केन्द्रमा समेतको आउन नसक्ने अशक्त तथा अपाङ्गता भएकालाई  भने घरमै पुगेर उपचार सेवा प्रदान गरिने ब्यवस्था मिलाइएको छ ।” उनले बताए ।

नगरपालिकाका उपप्रमुख बिजयकृष्ण श्रेष्ठले स्वास्थ्य जाँच र उपचारका लागि कष्टगरी अस्पतालसम्म आउनुपर्ने र लामो समय पालो कुर्नुपर्ने अवस्था अन्त्य गर्न नगरपालिकाले वडामै निशुल्क स्वास्थ्य सेवा पुर्याउनु परेको प्रष्ट पारे । यो कार्यक्रमले दीर्घरोगीलाई मात्र नभई रोग लाग्नु अगावै नै रोगको पहिचान गर्न पनि मद्दत पुग्ने उनले बिश्वास व्यक्त गरे ।

नेपाल कोरियामैत्री नगर अस्पतालका प्रमुख डा.दिपेन्द्र कुमार रौशनले यो कार्यक्रमले नगरबासीलाई सहज स्वास्थ्य सेवाको पहुँचमा पुर्याउने बताए । “जेष्ठ नागरिकको टोलमै पुगेर स्वास्थ्य सेवा दिँदा सबैलाई स्वास्थ्यको पहुँचमा पुर्याउन सकिन्छ ।” उनले भने ।

मध्यपुर थिमि नगरपालिकामा १० हजार ३ सय ५ जना ६० वर्ष उमेरमाथिको जनसंख्या रहेको स्वास्थ्य शाखा प्रमुख श्री कृष्ण प्रजापतिले जनाएका छन् । स्वास्थ्य बीमा नगरेका सो उमेर समूहका जेष्ठ नागरिक र महिला स्वास्थ्य अन्तर्गत गर्भवती महिलाको नगरपालिकाले निशुल्क बीमा गरिदिने उनले जानकारी गराए ।