भक्तपुरमा नवरात्री मेला शुरु भएको छ । घटस्थापनाको दिनबाट शुरु हुने मेलाले यहाँको आकर्षण थप बढाएको छ ।

भक्तपुरका विभिन्न नौ शक्तिपीठमा नवरात्री मेला शुरु भएको हो । रातको समयमा यी शक्तिपीठहरुमा ठूलो मेला लाग्ने गर्दछ । दिन अनुसार मेला सर्दै जाने परम्परा रही आएको छ । बिहान भक्तजनहरु मन्दिरमा पूजा गर्ने र साँझमा मेला भर्न जाने गर्दछन ।

बाजागाजा सहित गएका हजारौँ भक्तजनहरु मन्दिरमा मध्यरातिसम्म रहने हुदाँ यहाँको वातावरण उल्लाममय हुने गर्दछ ।

नवरात्रि मेलामा यहाँका शक्तिपीठमध्ये पहिलो दिन आज ब्रह्मायणी, दोस्रो दिन भोली महेश्वरी, तेस्रो दिन कुमारी, चौथो दिन भद्रकाली, पाँचौँ दिन बाराही, छैटौँ दिन इन्द्रायणी, सातौँ दिन महाकाली, आठौँ दिन महालक्ष्मी, नवौँ दिन त्रिपुरासुन्दरी र अन्तिममा विजयादशमीको दिन फेरि ब्रह्मायणीमा ठूलो मेला लाग्ने गर्दछ ।

नवरात्रीको अन्तिम दिन नवमी र दशमीको दिनमा उपत्यकाका विभिन्न जिल्लाबाट दर्शनार्थी भक्तपुरका शक्तिपीठ दर्शन गर्न र मेला भर्न आउने गर्दछन ।