भक्तपुर, १९ पुस २०७८नेपाल कम्युनिष्ट पार्टी (माओवादी केन्द्र) को राष्ट्रिय महाधिवेशनबाट भक्तपुरका दुईजना केन्द्रीय सदस्य निर्वाचित भएका छन् । केन्द्रीय सदस्य निर्वाचित हुनेहरु माओवादी केन्द्रका भक्तपुर इन्चार्ज दिलिपकुमार प्रजापति ‘भिष्म’ र महिला नेतृ प्रतिमा श्रेष्ठ ‘उर्मिला’ हुन् ।
काठमाडौको प्रज्ञा भवनमा ८ दिनसम्म चलेको आठौँ राष्ट्रिय महाधिवेशनबाट उनीहरु केन्द्रीय सदस्यमा सर्वसम्मत निर्वाचित भएका हुन् । नेता प्रजापति यस अघि पनि केन्द्रीय सदस्य रहेका थिए । तर, नेतृ श्रेष्ठले भने पहिलो पटक केन्द्रीय सदस्य हुने अवसर पाएकी छन् ।
तत्कालिन माओवादी जनयुद्धमा होमिएर पार्टी र क्रान्तिका लागि योगदान गरेका यी दुईजना श्रीमान् श्रीमती समेत हुन् । माओवादी शान्ति प्रक्रियामा आएपछि भूगोलको राजनीतिमा सक्रिय प्रजापति हाल माओवादी केन्द्रको भक्तपुर इन्चार्ज रहेका छन् भने श्रेष्ठ बागमती प्रदेश सभाकी समानुपातिक सांसद समेत हुन् ।
भक्तपुरमा जनयुद्धका बैज्ञानिक समेत भनेर चिनिने शहिद एवं बेपत्ता परिवारका देवेन्द्र श्रेष्ठ दिवाकर, युवा एवं बौद्धिक नेता डिपी ढकाल, त्यसैगरी बैचारिक क्षमताका नेताद्वय सुरेश न्यौपाने र कृष्णलाल गोजा भने केन्द्रीय समितिमा छुट्न पुगेका छन् । माओवादी केन्द्रले केहि सदस्य पछि मनोनित गर्नेगरी २९९ सदस्यीय केन्द्रीय समिति आइतवार सर्वसम्मत निर्वाचित गरेको हो । केन्द्रीय समितिले पदाधिकारी निर्वाचित गर्ने बताइएको छ ।