मानव बेचबिखनविरुद्ध कार्यरत माइती नेपालले २५ वर्षको अवधिमा जोखिममा परेका ३६ हजार ४५ महिला तथा बालबालिकाको उद्धार गरेको जनाएको छ ।

रोकथाम, उद्धार र पुनःस्थापनामा कार्यरत संस्थाले १८ हजार ५५ जना विभिन्न समस्या परेकालाई कानुनी सहयोग, १० हजार ६ सय ६५ घरेलु हिंसापीडितलाई मध्यस्थता गरेको कार्यकारी निर्देशक विश्वराम खड्काले जानकारी दिए ।

माइती नेपालले गरेको मेची–महाकाली जनचेतना अभियानको हेटौंडामा आयोजित समापन कार्यक्रममा उनले १५ सय १७ जना पीडकलाई कानुनी कारबाही गरी जेल चलान गरिएको बताए ।

प्रदेश ३ मा रहेका जिल्लामा मानव बेचबिखनको उच्च जोखिम रहेको उल्लेख गर्दै उनले रोकथामका लागि प्रत्येक नागरिक सचेत हुनुपर्ने बताए ।

कार्यक्रममा प्रदेश ३ का सभामुख सानुकुमार श्रेष्ठले मानव बेचबिखन रोकथामका लागि संसद्मा संकल्प प्रस्ताव लैजाने बताए ।

मकवानपुरका प्रमुख जिल्ला अधिकारी चक्रबहादुर बुढाले बेचबिखनको शंका लागे नागरिकता दिने क्रममा सोधपुछ गर्ने गरेको बताए ।

जिल्ला समन्वय समितिकी उपप्रमुख भगवती पुडासैनीले आर्थिक सशक्तीकरणले मात्रै महिला हिंसा कम गराउन सकिने तर्क गरिन् ।

फागुन १० गतेदेखि चलेको अभियानअन्तर्गत बुधबार हेटौंडामा जनचेतनामूलक गीत, नाटकसमेत प्रस्तुत गरिएको थियो । (कान्तिपुर दैनिक)