भक्तपुर, १८ चैतसडकमा यातायात ब्यवसायीको सिन्डिकेट तोड्ने गरि नयाँ निर्देशिका आएको छ ।यातायात व्यवस्था विभागले आइतबार ‘यातायात व्यवस्थापन कार्याविधि निर्देशिका, २०७४’ जारी गर्दै यातायात क्षेत्रमा रहेको सिण्डिकेटको अन्त्य गराएको हो । तर, भक्तपुरमा भने नयाँ बस सेवालाइ संचालनको अनुमति दिएको भन्दै आइतवारबाटै अनिश्चितकालिन यातायात बन्दको घोषणा गरिएको छ ।
भक्तपुरमा साझा यातायात भित्राउदा बिरोध गरेका व्यवसायीले मयुर यातायातका बससमेत कुद्न थालेपछि बन्दको घोषणा गरेका हुन् । भक्तपुरको साघुरा र कच्ची सडकहरुमा चल्ने बसहरु आजदेखि अनिश्चितकालका लागि बन्द भएको भक्तपुर मिनिबस सेवा समितिले जनाएको छ ।
एक दर्जन व्यवसायी समिति आबद्ध रहेको कोटेश्वरपूर्व यातायात समन्वय समितिको निर्णयबाट सेवा ठप्प पारिएको बताइएको छ । आन्दोलित समितिले चिल्ला बाटामा नाफा कमाउन नदिने भए बिग्रेका बाटामा गाडी नकुदाउने भन्दै आन्दोलनको बाटो समातेका हुन् ।
नगरकोट, तेलकोट, दुवाकोट, बालकोट, सिरुटार, सिपाडोल, डोलेश्वर, चाँगुनारायण, झौखेल, छालिङ, ताँथलीलगायतका ग्रामिण रुटमा दिदै आएको बस सेवा आइतवारदेखि अनिश्चितकालका लागि ठप्प पारिएको हो ।
यसबाट ग्रामिण क्षेत्रका यात्री र खासगरी कामकाजी मानिसहरु समस्यामा पर्ने भएका छन् । त्यतिमात्र होइन, भोली सोमबार विहान ९ देखि १० बजेसम्मको अफिस समयमा १ घण्टा अरनिको राजमार्गमा सार्वजनिक सवारी चलन नदिने र चैत २१ गतेदेखि कोटेश्वरबाट अरनिको राजमार्ग भएर चल्ने सबै सार्वजनिक सवारी बन्द गर्ने समेत आन्दोलित यातायात व्यवसायीले धम्की दिएका छन् ।