अविरल बर्षाका कारण भक्तपुरमा भुकम्प पीडितहरुको अवस्था दयनीय बनेको छ । यसैबीच आजको बर्षाका कारण एक घर भत्कदा ५ घाइते भएका छन ।

सूर्य विनायक नगरपालिका – १० चित्तापोल खुलाल गाउँमा विदुर थापाको ईटा माटोले बनेको तथा जस्ताले छाएको २ तले कच्ची घर भत्कदा परिवारका ५ सदस्य घाइते भएका हुन् । बेलुकी अन्दाजी ६ बजेको समयमा घर भत्कदा बर्ष ५० की पशुपती थापा, बर्ष २१ की सरदा थापा, बर्ष १८ को उमेश थापा, बर्ष २१ को रोसन थापा र बर्ष २० की सरिना थापा घाईते भएका हुन् ।

घटनास्थलमा महानगरीय प्रहरी वृत्त जगाती भक्तपुरबाट सिनियर प्रहरी अधिकृतको कमाण्डमा प्रहरी टोली खटी घाईतेहरुको उद्दार गरी धुलिखेल अस्पताल पठाईएको महानगरीय प्रहरी परिसर भक्तपुरका प्रहरी निरीक्षक मदन केसीले जानकारी गराएका छन ।

घाईतेहरुको उपचार भैरहेको र अवस्था सामान्य रहेको बताइएको छ ।