हुम्ला, १६ असार भारतीय पूर्व मिस इन्डिया एवंं अभिनेत्री जुही चावला बिना रुटपरमिट हुम्लामा आइपुगेपछि प्रहरी फन्दामा परेकी छन् ।
निषेधित क्षेत्र भएको कारण बिना रुटपरमिट हुम्ला आए पछि नियमानुसार पचास डलर जरिवाना गरेर चीन मै फिर्ता गर्नुपर्ने भए पनि भारतीय दुतावास, गृहमन्त्रालय र मुख्य मन्त्रीको दवाबमा उनलाई ५० डलर प्रवेश शुल्क र दुुई हजार जरिवाना गरेर शनिवार नेपालगञ्ज हुँदै काठमाडांै पठाइएको छ ।
यो सबै ट्राभल्स एजेन्सीको गल्ति भएको र सो कुरा अभिनेतृ चावलाले बुझेको सहायक प्रमुख जिल्ला अधिकारी महेश कुमार पोखरेलले बताए ।
अभिनेत्री चावला मानसरोवर कैलाशको धार्मिक यात्रा गरि हुम्ला जिल्लाको सदरमुकाम सिमकोट आइपुगेकी थिइन् । चावला काठमाडौंबाट ल्हासा हुँदै कैलाश मानसरोवरको धार्मिक यात्रा गरेर नेपाल र चीनको सिमाना हिल्साबाट शुक्रवार हेलिकोप्टरमा सिमकोट प्रवेश गरेकी थिइन् ।
अभिनेत्री चावला शनिवार नेपालगंजतर्फ लागेकी छन् । उनी शुक्रबारै नेपालगञ्ज झर्ने कार्यक्रम भए पनि त्यही रुट परमिट समस्याको कारण एक रात प्रहरी नियन्त्रणमा बिताउनुपरेको हो ।
उनको रुटपरमिटका सम्बन्धमा बुझ्न प्रमुख जिल्ला अधिकारी ढुगानाको टोली हिल्सातर्फ गएको थियो । अभिनेत्री चावला एक रात सिमकोटमा बास बस्नुपरेको थियो । उनीसँग १२ सदस्यीय टोली रहेको र जसमा ३ जना भारतीय र ९ जना तेस्रो मुलुकका नागरिक रहेको प्रहरीले जनाएको छ ।