भक्तपुर, १ भदौ सत्तारूढ दल नेपाल कम्युनिष्ट पार्टी (नेकपा) ले जनवर्गीय संगठनको नेतृत्व चयन गरेको छ । आइतवार नेकपाले जनवर्गीय संगठनको नेतृत्व चयन गरेको हो ।
प्रधानमन्त्री निवास बालुवाटारमा बसेको सचिवालय बैठकले जनवर्गीय संगठनको नेतृत्वको चयन गर्नुका साथै विशेष कमिटी र प्रदेश सम्पर्क कमिटीका पदाधिकारी पनि तोकेको जानकारी प्राप्त भएको छ ।
सचिवालय बैठकले युवा संगठनको इन्चार्जको जिम्मेवारी नेता महेश बस्नेतलाई दिएको छ । पूर्व उद्योगमन्त्री समेत रहेका उनी नेकपाका केन्द्रिय सदस्य हुन् । तत्कालिन नेकपा (एमाले) को युवा संघको अध्यक्ष भएपछि उनले उक्त संगठनको उचाइ बढाउनुको साथै आफ्नो राजनीतिक उचाइ पनि बढाउन सफल भएका थिए । प्रधानमन्त्री ओली निकट मानिने बस्नेत भक्तपुर निर्वाचन क्षेत्र नम्बर २ बाट निर्वाचित संघीय सांसद समेत हुन् ।
त्यसैगरी सचिवालयले युवा संगठनको सह इन्जार्जको जिम्मेवारी रामप्रसाद सापकोटा ‘दिपशिखा’ लाई दिएको छ । सिन्धुपाल्चोक घर भएका दिपशिखा पार्टीको केन्द्रिय सदस्य हुनुका साथै उक्त संगठनको संयोजक समेत हुन् । उनी तत्कालिन नेकपा माओवादीको युवा संगठन योङ्ग कम्युनिष्ट लिगको भक्तपुर इन्चार्ज रहदा महेशसंग उनको विपरित ध्रुवको सम्बन्ध रहेको थियो । यतिबेला पार्टी एकता संगै यी दुवै जना केन्द्रिय सदस्यले नेकपाको युवा संगठन हाक्ने जिम्मेवारी पाएका छन् ।