भक्तपुर, २४ भदौ महानगरीय प्रहरी वृत जगातीले पेस्तोलसहित एक व्यक्तिलाई पक्राउ गरेको छ । पक्राउ पर्नेमा बाराका शम्भु प्रसाद साह रहेका छन् ।
जगाती वृत्तका प्रमुख डीएसपी चक्रराज जोशीको कमाण्डमा खटीएको प्रहरी टोलीले साहलाई सोमबार पक्राउ गरेको हो । बिशेष सुचनाको आधारमा उनलाई पक्राउ गरिएको प्रहरीको भनाइ छ ।
सुर्यबिनायक नगरपालिका वडा नं.९ भातेढिकुर स्थित सडकमा शंकास्पद रुपमा हिडिरहेका फेटा गाउँपालिका- ३ बस्ने बर्ष ४१ को साहले कम्मरमा पेस्तोल लुकाएको अवस्थामा पक्राउ गरिएको महानगरीय प्रहरी परिसर भक्तपुरका सूचना अधिकारीसमेत रहेका डीएसपी रेवतीरमण पोखरेलले जानकारी गराए ।
डीएसपी पोखरेलका अनुसार बरामद भएको उक्त कटुवा पेस्तोलमा एक राउण्ड गोली लोड गरिएको थियो भने ५ थान गोली झोलामा फेला पारिएको थियो ।
साहलाई हातहतियार तथा खरखजाना मुद्दामा अदालतबाट म्याद लिई अनुसन्धान गरिरहेको बताइएको छ ।