भक्तपुर, २७ भदौ भक्तपुरमा जिल्ला ब्यापी शारीरिक सुगठन सम्बन्धी प्रतियोगिता हुने भएको छ । शारीरिक सुगठन तथा फिट्नेस संघ भक्तपुरको आयोजनामा उक्त प्रतियोगिता हुन लागेको हो ।
भक्तपुर जिल्ला शारीरिक सुगठन तथा फिट्नेस संघले शुक्रवार पत्रकार सम्मेलन मार्फत असोज ३ र ४ गते प्रतियोगिता हुने बताएको छ । संघले पुरुषहरुको लागि मिस्टर भक्तपुरको चौथो सस्करण तथा महिलाहरुको लागि पहिलो महिला एथलेटिक्स फिजिक्स प्रतियोगिता हुने जानकारी गराएको हो ।
संघका अध्यक्ष बाबुकाजी मानन्धरले जनाए अनुसार प्रतियोगिताको प्रि जजिङ असोज ३ गते एक क्लवमा र फाईनल ४ गते ठिमीस्थित एक पार्टी प्यालेसमा गरिने तयारी रहेको छ । उनका अनुसार प्रतियोगितामा ५० बढी खेलाडीले प्रतिस्पर्धा गर्ने अपेक्षा गरिएको छ ।
तौल समुहको आधारमा खेलाइने प्रतियोगितामा बिजेताहरुलाई पाचौ स्थानसम्म पुरस्कारको व्यवस्था गरिएको बताइएको छ ।
मिष्टर भक्तपुर बन्न सफल खेलाडीले ५० हजार नगद सहित,ट्रफि र प्रमाण पत्र प्राप्त गर्ने तथा महिला एथलेटिक्स फिजिक्सतर्फ उपाधि हासिल गर्नेले २५ हजार नगदसहित पदक र प्रमाणपत्र प्राप्त गर्ने संघका सल्लाहकार रामकृष्ण मानन्धरले जानकारी गराए । प्रतियोगितामा पुरुष तर्फ पाचौ स्थान सम्मकै लागि नगद पुरस्कारको व्यवस्था भएपनि महिलातर्फ चौथो र पाँचौ हुनेले भने ट्रफी र प्रमाणपत्र मात्र प्राप्त गर्ने बताइएको छ ।
संघले जनाए अनुसार रास्ट्रिय पुरस्कार प्राप्त गरिसकेका जिल्लाका खेलाडी भने यस प्रतियोगितामा सहभागी हुन पाउने छैनन् । यो खेल प्रति आकर्षण बढाउँन प्रतियोगिता आयोजना गर्न लागिएको आयोजकको भनाइ छ ।