भक्तपुर, १७ कात्तिकआइतवार बिहानै उदाउँदो सूर्यलाई अर्घ दिई छठ पूजा विसर्जन गरिएको छ । अघिल्लो दिन(षष्टी)मा अस्ताउदो सूर्यलाई अर्घ दिई रातभर सूर्य भगवान र उनकी बहिनी षष्टीमाता (छठी मैया)को उपासना गरी सप्तमीका दिन बिहानै पुन: अर्घ दिएपछि पूजा बिसर्जन भएको हो ।
नदी,पोखरी वा जलाशयको किनारमा घाट बनाई ब्रतालूहरु षष्टीको साँझ र त्यसको भोलीपल्ट बिहान सूर्य र छठी मैयाको पूजा अर्चना र उपासना गर्दछन् । यो पर्वको विशेषता भनेको यसमा कुनै मूर्ती पूजा हुँदैन । पवित्र मनले प्रकृतीको पूजा गरिने यो छठ पर्व मनाउँदा पारिवारिक कल्याण, सन्तानसुख तथा मनोकामना पूरा हुने विश्वास गरिन्छ । यो पर्व हिन्दूले मात्र नभइ मुस्लिम समुदायका व्यत्तिले पनि बिधिबत मनाउछन् ।
सृष्टिको सुरूवातदेखि नै सूर्यको उपासना गरिंदै आएको पाइन्छ । अग्नि पुराणमा पनि षष्ठी व्रतको प्रसंग उल्लेख छ। चौध वर्षको वनवास र एक वर्षको अज्ञातवास बसेको बेला कुन्ती, द्रौपदी सहित पाण्डवले यो व्रत गरेको वर्णन महाभारतमा पाइन्छ । त्रेता युगमा राजा दशरथकी रानी कौशल्याले पनि यो व्रत गरेको बताइन्छ । कात्तिक महिनामा मनाइने छठलाई ठूलो छठ भनिन्छ । चैतको षष्ठी तिथिमा पनि केही ठाउँमा यो पर्व मनाइन्छ ।तर, नेपालमा भने चैतमा छठ मनाइदैन ।
यो पर्वको बिशेष परिकार वा प्रसादको रुपमा ठेकुवा र भुसुवा रहेको पाइन्छ । त्यसका अलावा उखु, केराउ, केरा, नरिवल, मिठाई, चना, कागती र अदुवा पनि प्रसादको रुपमा अर्पण गरी खाने चलन छ ।
नेपालमा विशेष गरी तराइ क्षेत्रमा मनाइने यो पर्व पछिल्लो समय राजधानी लगायत देशको धेरै ठाउँहरुमा उत्तिकै भव्यताका साथ् मनाउन थालिएको छ । कठोर ब्रतको रुपमा रहेको छठ पर्व भक्तपुरमा पनि भव्यताका साथ् सम्पन्न भएको छ ।