भक्तपुर प्रहरीले लागुऔषध काराेवारीलाई नियन्त्रणमा लिएकाे छ । पक्राउ पर्नेमा भेलुखेल बस्ने बर्ष ४८ को राजन भेले रहेका छन् ।

भेलेलाई उनकै भक्तपुर-४ स्थित घरबाट मंगलवार साँझ पक्राउ गरिएको महानगरीय प्रहरी परिसर भक्तपुरले जनाएको छ । परिसरका सूचना अधिकारी रेवती रमण पोखरेलका अनुसार सोमबार भक्तपुरको तौमडीबाट लागुऔषध सहित पक्राउ परेका २० वर्षिय दुई युवकहरुले पोलेपछि मंगलवार भेले पक्राउ परेका हुन् ।

”अनुसन्धानको क्रममा लागु औषध बेचबिखनमा संलग्न भनि खुल्न आएकाले भक्तपुर-४ भेलुखेल बस्ने बर्ष ४८ को राजन भेलेलाई पक्राउ गरिएको हो ।” डीएसपी पोखरेलले भने ।

भेलेलाई नियन्त्रणमा लिई खानतलासी गर्दा फेनेरागन ३८ थान एम्पुल २, नुर्फिन, ३६ थान एम्पुल ३, डाईजेल्याब ३९ थान एम्पुल ४, नाईट्राभेट १ पत्ता (१५ट्याब्लेट) र सिरिन्जहरु बरामद गरिएको छ । उनको साथबाट बिभिन्न ब्रान्डका ५० बढी मोवाईल सेटहरु र नगद नौ हजार रुपैया समेत बरामद भएको बताइएको छ ।

भेलेको घरमा लागु औषध खरिद गर्न आएका भक्तपुर-६ भोलाछे बस्ने बर्ष १८ को आयुष कस्तीलाई समेत मंगलवार साँझ पक्राउ गरी परिसरमा पुर्याइएको र थप अनुसन्धान कार्य भईरहेको प्रहरीको भनाइ छ ।