भक्तपुर, २० कात्तिकभारतले आफ्नो नयाँ नक्सामा नेपाली भूभाग अतिक्रमण गरेपछि नेपाल मजदुर किसान पार्टीले उक्त कदमको बिरोध गरेको छ । बुधवार भारतीय कदमको बिरोधमा नेमकिपाले भक्तपुरमा विरोध जुलुस निकालेको हो ।
भारत सरकारले शनिवार सार्वजनिक गरेकाे नयाँ नक्सामा नेपालको भूमि लिम्पियाधुरा (कालापानी र लिपुलेकसमेत) राखेपछि मंगलवार नेमकिपाले प्रेस बिज्ञप्ति मार्फत सरकारलाई ध्यानाकर्षण समेत गराएको थियो ।
”भारत सरकारले नेपालको भूमि लिम्पियाधुरा (कालापानी र लिपुलेकसमेत) आफ्नो क्षेत्रमा राखेर तयार पारेको नयाँ नक्साबारे नेपाल सरकारको आधिकारिक धारणा अविलम्ब सार्वजनिक गर्न र यसको कडा विरोध गर्न नेमकिपा जोडदार माग गर्दछ ।’ बिज्ञप्तीमा भनिएको छ ।
बुधवार कमलविनायक चोकबाट शुरु भएको विरोध जुलुस भक्तपुरको सुर्यबिनायकमा आएर विराेध सभामा परिणत भएको थियो । उक्त सभालाई सम्बोधन गर्दै नेपाल मजदुर किसान पार्टीका केन्द्रीय नेता एवं प्रतिनिधि सभा सदस्य प्रेम सुवालले आफ्नो भूमि अतिक्रमण हुँदा पनि नेपाल सरकार मौन बसेपछि सरकारलाई सचेत गर्न जनता जाग्नुको बिकल्प नभएको बताएका थिए । विराेध कार्यक्रममा प्रदेश सांसद सुरेन्द्र राज गोसाई , सृजना सैंजु लगायत नेमकिपाका नेताकार्यकर्ता एवं जनसमुदायको सहभागिता रहेको थियो ।