नेपाली काँग्रेसको युवा संगठन नेपाल तरुण दल भक्तपुरले सरकार बिरुद्ध मसाल जुलुस गरेको छ । विहीवार साँझ ठिमीमा मशाल जुलुस गरिएको हो ।

बहाखा बजारबाट शुरु भएको मसाल जुलुसमा नेपाली काँग्रेसका भक्तपुर सभापति दुर्लभ थापा लगायतका जिल्ला नेताहरु समेत सहभागी भएका थिए । सरकारको अधिनायकबाद बिरुद्ध मसाल जुलुस गरिएको काँग्रेस नेता रंजन ढुंगेलले जानकारी गराए । तरुण दलको सरप्राइज मसाल जुलुस सफलतापूर्वक नयाँ ठिमीमा आइ कोण सभामा परिवर्तन भएको थियो । प्रहरीको उनीहरुलाई रोक्ने प्रयास असफल भएपछी उक्त मसाल जुलुस नयाँ ठिमीमा कोण सभा गरी समापन भएको हो ।

सरकार बिरुद्ध नाराबाजी गर्दै निकालिएको काँग्रेसको मसाल जुलुसलाई स्थानीयले कौतुहलतापूर्वक हेरेका थिए । नयाँ ठिमीस्थित मूल सडकमै कोण सभा हुँदा केहि बेर सवारी आवागमन पनि प्रभावित बनेको थियो ।

कोण सभालाई सम्बोधन गर्दै तरुण दलका भक्तपुर सभापति राजु थापाले चीनबाट नेपाली उद्धारको नाममा खरीपाटीमा सरकारले जबर्जस्ती उनीहरुलाई राख्न लागेकोले त्यसको प्रतिकार स्वरुप मसाल जुलुस आयोजना गरिएको बताए । सरकार भक्तपुरमा कोरोना भाइरस फैलाउन उद्धत रहेको आरोप लगाउदै थापाले खरीपाटीमा तरुण दलले कुनै पनि हालतमा उनीहरुलाई राख्न नदिने उद्घोष गरेका थिए ।

तस्वीर : रविन न्यौपाने

भक्तपुर पोस्टको फेसबुक पेज लाइक गरी फेसबुकमै समाचार प्राप्त गर्नुस्