भक्तपुर, २१ फागुन भक्तपुरका एक पूर्व प्रहरी नायव उपरीक्षक (डीएसपी) पक्राउ परेका छन् । जवर्जस्ती करणी अभियोग लागेका पूर्व डीएसपी राजकुमार खिउजूलाई प्रहरीले पक्राउ गरेको हो ।
एक वर्ष अघि ललितपुरको महानगरीय प्रहरी वृत्त चापागाउँको प्रमुख रहँदा खिउजूले एक युवतीलाई पटक–पटक बलात्कार गरेको अभियोग लागेको थियो । पिडित भनिएकी युवतीले महानगरीय प्रहरी परिसर, जावलाखेलमा खिउजू विरुद्ध उजुरी दिएपछि उनलाई भक्तपुरबाट पक्राउ गरिएको हो । ललितपुर प्रहरी प्रमुख एसएसपी टेकप्रसाद राईले खिउजूलाई पक्राउ गरिएको पुष्टि गरे ।
पूर्वडिएसपी खिउजूले महानगरीय प्रहरी वृत्त चापागाउँको प्रमुख हुँदा ३० माघ २०७५ मा पुलिस रिपोर्ट बनाउन पुगेकी युवतीलाई सहयोग गर्ने वहानामा एक्लै बनाएर कार्यकक्षमै इज्जत लुटेको युवतीले उजुरी दिएकी छन् । त्यतिमात्र होइन, उजुरीमा भनिएको छ कि खिउजूले युवतीसँग तस्वीर समेत खिचेर ‘ब्ल्याकमेल’ गरि ६ महिनासम्म शारीरिक शोषण गरेका थिए ।
खिउजूले भने उक्त उजुरी आफूलाई फसाउने नियतले गरिएको जिकिर गर्दै आएका छन् । उनले नेपाल प्रहरीबाट स्वेच्छिक अवकाश लिएका थिए ।