भक्तपुर, २८ फागुन । निर्वतमान संचारमन्त्री गोकुल बाँस्कोटाको भक्तपुर स्थित घरमा प्रेसर कुकर वम विस्फोट भएको छ । उनले तला थपिरहेको मध्यपुर थिमी -१ लोकन्थलीस्थित घरमा उक्त बम बिस्फोट भएको हो ।
महानगरीय प्रहरी परिसर भक्तपुरका सूचना अधिकारी रहेका डीएसपी दिपक गिरीले निवर्तमान मन्त्री बाँस्कोटाको घरमा बम बिस्फोट भएको पुष्टि गरे । बिहान करिब पौने ८ बजेको समयमा अज्ञात समूहले बम बिस्फोट गराइ फरार भएको उनले भक्तपुर पोस्ट लाई जानकारी गराए । उक्त बिस्फोट गराइएको बम प्रेसर कुकर बम भएको बताइएको छ । ” घटनास्थलमा प्रेसर कुकरका टुत्रा फेला परेका छन् । प्रेसर कुकर बम बिस्फोट गराइएको देखिन्छ ।” डीएसपी गिरीले जानकारी दिए ।
बम विष्फोटबाट घरको कम्पाउन्डमा क्षति पुग्नुका साथै छिमेकीका घर र एउटा भ्यानमा समेत क्षति पुगेकाे बताइएकाे छ । विस्फोटबाट घरको सिसाहरु पनि फुटेका छन् ।
खबर प्राप्त हुनासाथ घटनास्थलमा प्रहरी पुगिसकेको र बिस्फोटमा संलग्नको खोजी भैरहेको डीएसपी गिरीको भनाइ छ ।