ठिमी, ७ चैत छ लेन सडक अन्तर्गत राधे राधे चोकमा बसको ठक्कर बाट एक मोटरसाइकल चालकको ज्यान गएको छ । शुक्रवार दिउँसो करिब पौने चार बजेको समयमा भएको दुर्घटनामा परी ३३ वर्षीय युवकले ज्यान गुमाएका छन् ।
भक्तपुरबाट काठमाडौंतर्फ जादै गरेको बा ८० प ८६९२ नं. को मोटरसाईकललाई सोही दिशा तर्फ जाँदै गरेको प्रदेश नं. ३-०१-००६ ख ०३७९ नं.को बसले ठक्कर दिँदा दुर्घटना भएको हो ।
ज्यान गुमाउने मोटरसाइकल चालक काभ्रेपलाञ्चोकको तिमाल ९ घर भई हाल भक्तपुरको सुर्यबिनायक बस्ने बर्ष ३३ को देबराज लामा भएको महानगरीय प्रहरी परिसरले जनाएको छ । परिसरका डीएसपी दिपक गिरीका अनुसार बसको ठक्कर बाट घाईते भएका लामालाई राधे राधे चोकमा खटिएको प्रहरी टोलीले उद्धार गरी तत्कालै मध्यपुर अस्पताल ठिमी पुर्याएको थियो । मध्यपुरबाट थप उपचारका लागि बी. एण्ड बी. अस्पताल लगिएकोमा उपचारकै क्रममा लामाको करिब सवा छ बजेको समयमा ज्यान गएको चिकित्सकले घोषणा गरेका थिए ।
दुर्घटना गराउने बस र त्यसाका चालक चाँगुनारायण ९ ताथली बस्ने बर्ष २८ को प्रबिन त्यातलाई नियन्त्रणमा लिई महानगरीय प्रहरी वृत्त ठिमीमा राखिएको र दुर्घटनाबारे थप अनुसन्धान भैरहेको प्रहरीको भनाइ छ ।यस अघि मध्यपुर ठिमी ३ कौशलटार स्थित छ लेन सडकमा मंगलवार दिउसो मोटरसाइकल र स्कुटर ठोक्किदा मोटरसाइकल चालक काभ्रेपलाञ्चोककै २२ वर्षय युवक पनौती १२ रोशी बस्ने सरोज श्रेष्ठको ज्यान गएको थियो ।