छ लेन सडक अन्तर्गत सल्लाघारीको तिनकुनेमा सडक दुर्घटना भएको छ । सडकमा सुरक्षार्थ बसिरहेका प्रहरी नै सडक दुर्घटनामा परेका छन् ।

मंगलवार भएको उक्त दुर्घटनामा परी ३ जना प्रहरी घाइते भएका छन् । उनीहरुलाई उपचारका लागि नजिकैको डा इवामुरा मेमोरियल अस्पताल पुर्याइएको छ ।

विहान करिब साढे छ बजेको समयमा काठमाडौबाट आइरहेको एक ८ चक्के लरी अनियन्त्रित भइ तीनकुनेस्थित सोलार पोलमा ठक्कर दिन पुगेको थियो । त्यसपछि आइरहेको अर्को ना ३ च ६२२४ नम्बरको कुखुरा बोक्ने जीपले पोल लतारेपछि त्यसमा रहेकाे लत्रेको इन्टरनेटको तारले सडकमा रहेका प्रहरीलाई समेत लतारेकाे र  उनीहरु घाइते भएका हुन् । स्थानीयले घाइते प्रहरीहरुलाई उद्धार गरी अस्पताल पुर्याएका छन् । उनीहरु खतरामुक्त रहेको इवामुरा अस्पतालले जनाएको छ ।

सोही ठाउँमा यस अघि पनि पटक पटक दुर्घटना हुने गरेका छन् । पानी पर्यो कि क्रसिङमा एक्कासी रोक्न पर्दा सवारीहरू दुर्घटना हुने गरेका एक प्रहरीले जानकारी गराए । उनका अनुसार सडक चिल्लो बनाउन ठिमीकाे एसएसदेखि सूर्यविनायक सम्म दलिएको मोबिल र अलकत्राका कारण पानी पर्यो कि सवारीहरु चिप्लिन्छन् र दुर्घटना बढी भैरहेको छ । स्थानीय समेत रहेका नेपाली काँग्रेस भक्तपुर जिल्ला सभापति दुर्लभ थापाले पानी पर्यो कि सधै दुर्घट्ना हुने यो सडक विभागको गम्भीर लापरवाही भएको बताएका छन् । सडकमा चिप्लने र दुर्घटना हुने क्रम रोक्न उनले माग समेत गरे ।

तस्वीर : राजेशमान मानन्धर/भक्तपुरपोस्ट