भक्तपुर, १६ असारभक्तपुर प्रहरीले व्यक्ति हत्याको आरोपमा एक युवकलाई पक्राउ गरेको छ । पक्राउ पर्नेमा सिन्धुलीको तिनपाटन गाउँपालिका लाम्पान्टार घर भई हाल भक्तपुर ४ गहिटी बस्ने ईन्द्र बहादुर तामाङ रहेका छन् ।
ज्याला मजदुरी काम गर्ने ३० वर्षीय तामाङले जडिबुटी नामले चिनिने कृष्ण तामाङको हत्या गरेको आरोप लागेको छ । सोमबार गहिटी स्थित सार्वजनिक पाटीमा अन्दाजी बर्ष ४५ को जडिबुटी उपनामले चिनिने कृष्ण तामाङ मृत अवस्थामा फेला परेका थिए । अपराध अनुसन्धानमा जुटेको प्रहरीले ईन्द्र बहादुरलाई हत्या आरोपमा पक्राउ गरेको हो ।
महानगरीय प्रहरी परिसर भक्तपुरका इन्स्पेक्टर भगवती तिमल्सिना र अपराध महाशाखाबाट आएका अर्का इन्स्पेक्टर किशोर ढुंगानाको संयुक्त अनुसन्धान टोलीले घटनास्थलमा खटी गई अनुसन्धान गर्दा मृतकको टाउको, निधार र चिउडोमा चोट लागेको देखिएकोले कर्तब्य गरी मारिएको प्रारम्भिक अनुसन्धान गरेका थिए । अभियुक्तलाई खोजतलास गर्ने क्रममा ३०वर्षीय ईन्द्र बहादुर तामाङ पक्राउ परेका हुन् । आपसी विवाद हुँदा ढुंगाले टाउकोमा प्रहार गरी कर्तब्य गरी मारेको भन्ने खुल्न आएको हुँदा उनलाई पक्राउ गरीएको प्रहरीको भनाइ छ ।
पक्राउ परेका ईन्द्र बहादुरलाई महानगरीय प्रहरी परिसर, भक्तपुरमा राखी थप अनुसन्धान कार्य भईरहेको डिएसपी दिपक गिरीले जानकारी दिए ।