भक्तपुर, १५ साउनतत्कालका लागि लकडाउन अवधिको घरभाडा नउठाउन सर्वोच्च अदालतले अन्तरिम आदेश जारी गरेको छ । रिट परेपछि सर्वोच्च अदालतले यस्तो आदेश जारी गरेको हो ।
बिहीवार न्यायाधीशद्वय तेजबहादुर केसी र कुमार रेग्मीको संयुक्त इजलासले तत्कालका लागि लकडाउन अवधिको घरभाड नउठाउन अन्तरिम आदेश जारी गरेको छ । सर्वोच्चले घर भाडा तिर्न नसक्ने र दैनिक श्रम गरिरहेका व्यक्तिहरुको बारेमा सरकारसँग लिखित जवाफ माग गर्दै तत्कालका लागि लकडाउन अवधिको घरभाडा नउठाउन आदेश जारी गरेको हो ।
सैलुन व्यवसायीहरुको संगठन ‘नाई संघ’का अध्यक्ष गजेन्द्र ठाकुरले दायर गरेको रिटमा बिहीबार यस्तो अन्तरिम आदेश जारी भएको छ । यसबारे अन्तिम फैसला भने हुन बाँकी छ ।
ठाकुरले कोभिड १९ कारण भएको लकडाउनको अवधिको भाडा नउठाउन माग गर्दै रिट दायर गरेका थिए । उनले प्रधानमन्त्री तथा मन्त्रिपरिषदको कार्यालय , ७ वटै प्रदेशका मुख्यमन्त्री तथा मन्त्रीपरिषद कार्यालयलाई विपक्षी बनाउँदै रिट दायर गरेका हुन् ।