भक्तपुर, १४ माघ २०८१झापा । झापाको बिर्तामोड नगरपालिकाले नेपालकै नमूनाको रुपमा तरकारीको न्यूनतम समर्थन मूल्य कायम गरी किसानलाई राहत दिएको छ । नगरपालिकाले तरकारी बालीहरुको न्यूनतम समर्थन मूल्य कायम गरेपछि किसानहरु लाभान्वित भएका छन् ।
काउली देखि टमाटर सम्म १६ थरी तरकारीमा न्यूनतम समर्थन मूल्य कायम गरिएको बिर्तामोड नगरपालिकाका कृषि शाखा प्रमुख राजेन्द्र कडरियाले बताए । सबैभन्दा कम मूल्य फर्सी र काक्रोको २५ रुपैयाँ प्रति किलो कायम गरिएको छ भने सबैभन्दा बढी मूल्य खुर्सानीको प्रति किलो ५४ रुपैयाँ छ ।
हेर्नुस् मूल्य सूची
नगरपालिकाले कृषि बजारस्थित आफ्नो तरकारी संकलन केन्द्रमा सो मूल्य उपलब्ध गराउने बताइएको छ । नगरपालिकाले प्रत्येक वडामा बिक्रि केन्द्र खोली संकलित तरकारी बेच्ने ब्यवस्था समेत मिलाएको छ । यसरी एकातर्फ किसानलाई न्यूनतम मूल्यको ग्यारेन्टी र उपभोक्तालाई बिषादी न्यूनीकरण गरिएको तरकारी उपलब्ध गराउन नगरपालिका तल्लीन रहेको कृषि शाखा प्रमुख कडरियाले बताएका छन् ।
कृषिप्रधान देशमा कृषकलाई उत्पादन लागत उठाउन धौधौ भैरहेको अवस्थामा बिर्तामोड नगरपालिकाले आशा जगाएको किसानहरु बताउँछन् । कृषि फार्म खोलेर तरकारी खेती गरिरहेका किसान राममणी बरालले नगरपालिकाको न्यूनतम मूल्यले किसानको आस र सास जोगाएको प्रतिक्रिया दिएका छन् । अन्य नगरपालिकालाई पनि बिर्तामोड बाट सिक्न उनले सुझाव दिए ।
बजार मूल्य भन्दा आधा बढी न्यूनतम मूल्य कायम गरी खरिद पनि गरिदिने नगरपालिकाको यो कदमलाई किसानहरुले कृषि क्रान्तिको शुरूवात भएको भन्दै सन्तोष ब्यक्त गरेका छन् । यसले कृषि प्रति नयाँ पुस्तालाई आकर्षण गर्न र उत्पादन बढाउन मद्दत मिल्ने नगरपालिकाले बिश्वास लिएको छ ।