भक्तपुर, ४ फागुन २०८१चाँगुनारायण नगरपालिकाको वडा नम्बर ७ ले नगरकोट भ्रमण बर्ष २०८२ को तयारी तीब्र बनाएको छ । सोही अन्तर्गत सोमबार वडास्तरीय आयोजक समिति विस्तार गर्ने कार्यक्रम रहेको छ ।
वडाध्यक्ष श्यामकाजी नयाँजूले एक सूचना जारी गर्दै कार्यक्रममा उपस्थितिको लागि वडाबासीलाई अनुरोध गरेका छन् । सोमबार बिहान ११:०० बजे बागेश्वरीस्थित वडा कार्यालयमा बृहत छलफल आयोजना गरिएको वडाध्यक्ष नयाँजूले जनाएका छन् । त्यहाँबाट वडास्तरीय आयोजक समिति विस्तार गरिने उनले जानकारी गराए ।
चाँगुनारायण नगरपालिकाले घोषणा गरेको नगरकोट भ्रमण वर्षलाई ११ औं नगर सभाबाट अनुमोदन गरी तयारी तीब्र बनाएको हो । विश्वप्रसिद्ध पर्यटकीय स्थल नगरकोटमार्फत समग्र नगरकै प्रचार प्रसार र पर्यटन बिकासको लक्षसहित भ्रमण वर्ष मनाउन लागिएको छ । वडा नम्बर ७ ले भ्रमण बर्ष सफल पार्न सक्दो काम गर्ने वडाध्यक्ष नयाँजूले बताएका छन् ।