भक्तपुर नगरपालिका विपद व्यवस्थापन समितिको बैठकले क्वारेन्टाइनको व्यवस्था नगर्ने उद्योगधन्धाहरू बन्द गराउन सिफारिस गर्ने निर्णय गरेको छ । उद्योग परिसरमा क्वारेन्टाइनको अनिवार्य व्यवस्था गर्न उद्योगपतिहरूलाई निर्देशन दिन र सो बमोजिम नभए उद्योगधन्धाहरू बन्द गराउन सिफारिस गर्ने निर्णय गरिएको हो ।

नगर प्रमुख एवम् नगर विपद् व्यवस्थापन समितिका संयोजक सुनिल प्रजापतिको अध्यक्षतामा बुधबार बसेको बैठकले यस्तो निर्णय लिएको नगरपालिकाकी प्रेस संयोजक कीर्तिका प्रजापतिले जानकारी गराइन् । भक्तपुर नगरपालिका क्षेत्रमा रहेका उद्योगधन्धा एवम् कल–कारखानाहरूमा कार्यरत कर्मचारी र मजदुरहरूमा समेत कोभिड १९ रोगको संक्रमण बढिरहेको स्थितिमा जोखिमको संवेदनशीलतालाई मध्यनजर गरी आफ्ना मजदुर एवम् कर्मचारीहरूलाई आफ्नै उद्योग परिसरमा क्वारेनटाइनमा राखी उद्योग संचालन गर्ने वातावरण बनाउन यस्ताे निर्णय लिइएकाे बताइएकाे छ ।

यसका साथै बैठकमा वडाहरूमा जारी राष्ट्रिय परिचय पत्रका लागि विवरण संकलन तथा फोटो खिच्ने अभियान स्थगनका लागि जिल्ला प्रशासनलाई आग्रह गर्ने समेत निर्णय लिइएको छ ।

त्यसैगरी नजिकिएको कुशे औंसी अर्थात बुबाको मुख हेर्ने पर्वलाई औपचारिकतामा मात्र सीमित गर्न सार्वजनिक अनुरोध गर्ने, बजार क्षेत्र तथा राजमार्ग र सहायक मार्ग वरपरका क्षेत्रमा अव्यवस्थित रुपमा राखिएका ठेलागाडा, साइकल र फुटपाथमा राखिएका पसल व्यवस्थित गर्ने, नगरपालिका प्रवेश गर्ने प्रमुख नाकाहरूमा थप कडाइ गर्न नगरपालिका, प्रशासन कार्यालय, महानगरीय प्रहरी, स्वयम्सेवक तथा सरोकारवाला संस्थाहरूको तर्फबाट एकीकृत गस्ती परिचालन गर्ने र चोक तथा गल्लीहरुमा किटनाशक औषधी छर्कने लगायत निर्णय भएको जानकारी प्राप्त भएको छ ।

बैठकमा नगर प्रमुख सुनिल प्रजापतिले भक्तपुर नगरपालिकाले कोरोना भाइरस समुदायमा संक्रमण हुनबाट रोक्न नगरपालिका, होटल र गृह क्वारेन्टाइनको व्यवस्था गर्दै आएको जानकारी गराएका थिए । विदेशबाट आएकाहरूलाई व्यवस्थापन गर्न नगरपालिकाले ९ जना कर्मचारीहरूको जिम्मेवारी दिएर खाटाईरहेको उनको भनाइ छ  ।

नगर प्रमुख प्रजापतिका अनुसार विभिन्न देशबाट हवाई मार्ग हुँदै भक्तपुर प्रवेश गरेका नगरबासीहरूको तथ्यांक अद्यावधिक गरी हालसम्म १ सय १ जना नगरबासीहरूलाई व्यवस्थापन गरिएको छ  ।

बैठकमा भक्तपुर नगरपालिकाका जनप्रतिनिधि, जिल्ला प्रशासन कार्यालय, महानगरीय प्रहरी परिसर, नेपाल रेडक्रस सोसाइटी, उद्योग वाणिज्य संघ भक्तपुर लगायतका प्रतिनिधिहरूले कोभिड १९ रोकथाम र नियन्त्रणको लागि नगरपालिकाले लिएको पहलप्रति सन्तोष व्यक्त गर्दै थप चुनौतीको लागि सबै संगै मिलेर कोभिड १९ बिरुद्ध लड्नुको बिकल्प नरहेको बताएका थिए ।

हेर्नुस् ९ निर्णय