भक्तपुर, ३२ साउन भक्तपुरकाे सल्लाघारीस्थित सैनिक आवासीय विद्यालयका पूर्व प्रमुख समेत रहेका नेपाली सेनाका सहायक रथी प्रयोग जबरा सहित ३ जनालाई बर्खास्त गरिएको छ । सैनिक अदालतले सहायक रथी जबरा, महासेनानी नविन सिलवाल र प्रमुख सुवेदार मिठुराम विश्वकर्मालाई सेवाबाट बर्खास्त गर्ने फैसला गरेको हो ।
नेपाली सेनाको जनसम्पर्क तथा सूचना निर्देशनालयले आईतबार प्रेस विज्ञप्तिमार्फत उक्त फैसला सार्वजनिक गरेको छ । पाँचखालस्थित वीरेन्द्र शान्ति कार्य तालिम केन्द्रमा कार्यरत रहँदा ‘सम्पत्ति र अनुशासन तथा आचरण सम्बन्धी कसूर अभियोगमा उनीहरुलाई दोषी ठहर गर्दै बर्खास्त गर्ने फैसला भएको बताइएको छ । गत जेठमा भ्रष्टाचार अभियोगमा उनीहरुलाई नियन्त्रणमा लिएर सैनिक हिरासतमा रखिएको थियो । फैसलामा राणालाई १ करोड ७२ लाख र सिल्वाललाई १५ लाख रुपैयाँ जरिवाना समेत सुनाइएको छ ।
अदालतले सहसेनानी लक्ष्मीकान्त खनाल, सुवेदार भोजबहादुर विष्ट र जमदार विनोद बस्नेतलाई एक तह घटुवा, प्राविधिक सहसेनानी फिरोज महर्जन र जमदार भद्रबहादुर शाहीलाई नसिहत र महासेनानी राजेन्द्रमणि गिरी र सुवेदार नवराज पाण्डेलाई सफाई दिने गरी फैसला गरेकाे समेत सेनाले विज्ञप्तिमार्फत जानकारि गराएको छ ।
यस अघि सैनिक आवासीय विद्यालय भक्तपुरमा कार्यरत रहँदा गत जेठ महिनामा सम्पत्ति र अनुशासन तथा आचरण सम्बन्धी मुद्दामा दोषी ठहरिएका ३ जना सैनिक अधिकृतसहित पांच जना लाई कारवाही गरिएको थियो ।
कारवाही पर्नेमा महासेनानी भुपालमान अधिकारी, प्रमुख सेनानी देवबहादुर क्षेत्री र हुद्धा यज्ञराज पोखरेल, हुद्धा गणेशबहादुर अधिकारी, लेखा आ. सहसेनानी सुरेन्द्र विक्रम भण्डारी रहेका थिए । सोही मुद्दामा अन्य १३ जनाले भने सफाई पाएका थिए ।