भक्तपुर, ४ भदौ भक्तपुरको कटुन्जे घर भई लामो समय देखि अस्ट्रेलियाको मेलवर्नमा बसोबास गर्दै आएका संचारकर्मी एवं साहित्यकार सुशील चालिसे र उनकी पत्नी अनिता भण्डारी चालिसेले सामाजिक सेवामार्फत आफ्ना दुई छोरीहरुको जन्मोत्सव मनाएका छन् । ६ वर्षिया छोरी शायना चालिसे र ३ वर्षिया छोरी समिका चालिसेको एकैदिन परेको जन्मदिनको अवसर पारेर उनीहरुले धुर्मुस सुन्तली फाउन्डेसनलाई आर्थिक सहयोग प्रदान गरेका हुन् ।
जनस्तरबाट निर्माण भईरहेको ‘गौतम बुद्ध अन्तर्राष्ट्रिय क्रिकेट रङ्गशाला’ निर्माण अभियानका लागि चालिसे दम्पतीले दुई छोरीको जन्मदिनको अवसर पारेर आर्थिक सहयोग गरेको कलाकारद्वय सिताराम कट्टेल(धुर्मुस) र कुन्जना घिमिरे(सुन्तली)द्वारा संचालित सामाजिक सस्था धुर्मुस सुन्तली फाउन्डेसनले जानकारी गराएको हो । फाउन्डेसनका अनुसार चालिसे दम्पतीले गौतम बुद्ध अन्तर्राष्ट्रिय क्रिकेट रङ्गशाला निर्माणका लागि ४३ हजार ३ सय ५७ रुपैयाँ सहयोग फाउण्डेशनलाई प्रदान गरेका छन् ।
भविष्यमा छोरीहरुमा पनि यस्तै सेवा गर्ने भावनाको बिकास होस भन्ने हेतुले आफूहरुले छोरीहरुको जन्मदिनमा सामाजिक सेवामा खर्च गर्ने गरेको संचारकर्मी एवं साहित्यकार सुशील चालिसेले बताए । आफूहरुले छोरीहरुको प्रत्येक जन्मोत्सवमा कुनै न कुनै सामाजिक संस्थालाई आर्थिक सहयोग प्रदान गर्दै आएको उनकाे भनाइ छ ।
चालिसे दम्पतीले यस अघि राधा पौडेल आबद्ध संस्था एक्सन वर्क नेपाल,दिक्षा चापागाईं आबद्ध पबित्र समाज नेपाल, नायिका स्वेता खड्काले सन्चालन गरेको स्वेता श्री फाउण्डेशन र गौतम लामिछाने एवं पद्मा पाण्डेद्वारा सन्चालित सामाजिक संस्था विरुवा नेपाललाई आर्थिक सहयोग गरी सामाजिक सेवामा जोडिएका थिए। उनीहरुकाे याे सामाजिक भावनाद्वारा गरिएकाे कार्य अनुकरणीय देखिन्छ ।
चालिसे दम्पत्तीले आफ्ना छोरीहरुको जन्मदिनका अवसरमा प्रत्येक वर्ष सामाजिक कार्यमा सरिक हुँदा सकारात्मक संदेश प्रवाह भएको सामाजिक अभियन्ता एवं गायक कपिल कस्पाल बताउँछन् । उनीहरुको कार्य अनुकरणीय र प्रेरणादायी भएको भन्दै कस्पालले भने,”धन भएर मात्र हुँदैन, मन हुनेले मात्र समाजमा योगदान दिनसक्छ । उहाँहरुले कति रकम सहयोग गर्नुभयो भन्दा पनि सहयोगको निरन्तरता र सहयोगी भावना ठूलो कुरा हो ।”