सूर्यविनायक, २० भदौ सूर्यविनायक ५ सल्लाघारीस्थित एक तरकारी ब्यापारीमा कोरोना पोजेटिभ पाइएपछि उक्त क्षेत्र सिल गरिएको छ । सल्लाघारीमा तरकारी ब्यापार गर्ने २७ वर्षका व्यापारीमा कोरोना पोजेटिभ पाइएपछि उक्त क्षेत्र सील गरिएको हो । उनमा कोभिड १९ को लक्षण देखिएपछि उक्त क्षेत्रका स्थानीय समेत रहेका नेपाली कांग्रेस भक्तपुरका जिल्ला सभापति दुर्लभ थापा लगायतको पहलमा कोभिड परिक्षण गरिएको थियो ।
परिक्षण गर्दा कोरोना पोजेटिभ देखिएका तरकारी ब्यापारी गुण्डूस्थित निवासमा आइसोलेसनमा रहेका जानकारी प्राप्त भएको छ । तरकारी बजारका ब्यापारीमा नै संक्रमण पुष्टि भएपछि स्थानीयबासी र स्थानीय ब्यापारी त्रसित बनेका छन् ।
उनीसँग कन्ट्याक्टमा रहेकाहरु कोभिड संग त्रसित नभई सतर्क भएर क्वारेन्टाइनमा रहनुपर्ने कांग्रेस सभापति थापाले सुझाव दिएका छन् । कन्ट्याक्टमा रहेकाहरुको स्वाब परिक्षणका लागि आफूले पहल गर्ने उनले बताए ।
महानगरीय प्रहरी प्रभाग कटुन्जेका इन्जार्ज रहेका प्रहरी नायब निरीक्षक ज्योति कार्कीले सल्लाघारीको तरकारी बजार सील गरिएकाले तरकारी किनमेलका लागि बैकल्पिक ब्यवस्था हुने बताए ।