जनप्रतिनिधि र कर्मचारीमा कोरोना पोजेटिभ पाइएपछि चाँगुनारायण नगरपालिकाको कार्यालय सिल गरिएको छ । कार्यालय सिल भएसंगै नगरपालिकाका सेवाहरु बन्द भएका छन् ।

जनसम्पर्कमा रहेका कार्यालयमा कार्यरत २ जना अधिकृतहरुमा कोरोना पोजेटिभ पाइएपछि सबैजना नै क्वारेन्टाइनमा बस्नुपरेको र सोहीकारण कार्यालय बन्द गरिएको मेयर सोमप्रसाद मिश्रले बताए । मेयर मिश्रका अनुसार कन्ट्याक्ट ट्रेसिंगमा परेका सबै कर्मचारी र जनप्रतिनिधिको स्वाब संकलन गरेर परीक्षणका लागि पठाइएको छ । सोको रिपोर्ट नआउन्जेलका लागि कार्यालय बन्द गरेको उनले जानकारी गराए ।

”रिपोर्ट आएपछि पोजेटिभ आउनेहरु आइसोलेसनमा बस्नुहुन्छ र नेगेटिभ आउनेहरुबाट कार्यालय संचालन गरिनेछ ।” उनले भने ।

चाँगुनारायण नगरपालिका हालसम्म कोरोनाबाट कम प्रभावित नगरपालिका हो । जिल्लाका अन्य नगरपालिका भन्दा यहाँ संक्रमित र मृतकको संख्या कम रहेको छ । नगर प्रमुख मिश्रका अनुसार नगरपालिकामा हालसम्म ३ सय ३० जनामा कोरोना सङ्क्रमण पुष्टि भएको भएतापनि सक्रिय संक्रमितको संख्या भने १ सय ४० रहेकाे छ । चाँगुनारायणमा कोरोनाको कारण एकजनाले मात्र ज्यान गुमाएका छन् ।