भक्तपुर, ४ कात्तिक भक्तपुर नगर भित्र रहेको श्री बाराही बचत तथा ऋण सहकारी संस्थाले कोरोना नियन्त्रणका लागि रु. २ लाख ५१ हजार ३ सय ८४ रुपैया आर्थिक सहयोग प्रदान गरेको छ । मंगलबार भक्तपुर नगरपालिकाका प्रमुख सुनिल प्रजापतिलाई श्री बाराही साकोसका अध्यक्ष बलराम प्रजापतिले मंगलबार उक्त रकमको चेक हस्तान्तरण गरेका हुन् ।
उक्त अवसरमा नगर प्रमुख प्रजापतिले नगरपालिकाको तर्फबाट सहकारीप्रति आभार प्रकट गरेका थिए भने विश्वव्यापी रुपमा फैलिएको कोभिड १९ संक्रमण रोकथाम र नियन्त्रणको लागि उक्त रकमको सहि सदुपयोग हुने बताएका थिए । ”भक्तपुर नपाले सञ्चालन गरेको आइसोलेसन केन्द्र व्यवस्थापनलगायतका आवश्यक व्यवस्थापनको लागि यसले ठुलो मद्दत पुग्छ ।” उनले भने ।
कोभिड १९ विरुद्धको लडाई सामुहिक एकताबाट मात्र सम्भव भएको भन्दै मेयर प्रजापतिले यस्तैबेला मानिसको चरित्रको परीक्षा हुने प्रष्ट पारे । कार्यक्रममा संस्थाका अध्यक्ष प्रजापतिलाई भक्तपुरका सम्पदाहरूको संक्षिप्त विवरणसहित नगरपालिकाले हालसम्म सम्पन्न गरेका र निर्माणाधीन केही सम्पदाहरूको विवरण समेटिएको ‘सम्पदा पुनःनिर्माण तथा जीर्णोद्धार’ नामक फोटो पुस्तक र नगरपालिकाका केही प्रकाशनहरु प्रदान गरेका थिए ।