भक्तपुर, २६ मंसिर मोटरसाइकल चोरी गरेको अभियोगमा प्रहरीले ४ जनालाई पक्राउ गरेको छ । चेकजाँच गर्नेक्रममा उनीहरु पक्राउ परेका हुन् ।
महानगरीय प्रहरी परिसरका प्रहरी निरीक्षक सुवास बुढाथोकीले बताए अनुसार मोटरसाइकल चोरी गरेको अभियोगमा दोलखा सैलुङ गापा २ घर भई हाल सूर्यविनायक ८ बस्ने बर्ष २३ को सोनाम वाईबा र बर्ष १९ को फुर्बा घिसिङ गएराती नै पक्राउ परेका छन् भने सोही ठेगाना भएका बर्ष १८ को संजिव तामाङ र सिन्धुपाल्चोक लिसंखुपाखर २ घर भई हाल पुरानोठिमी बस्ने बर्ष २१ को जिवन तामाङ लाई आज शुक्रवार पक्राउ गर्न प्रहरी सफल भएको छ ।
गएराती अन्दाजी १० बजेको समयमा भक्तपुर ४ राममन्दिर र चाँगुनारायण ९ ताथलीबाट मोटरसाइकल चोरी भएको खवर प्राप्त हुनासाथ खोजीका लागि ब्यापक प्रहरी परिचालन गरिएकाे थियाे । साेही क्रममा महानगरीय प्रहरी वृत्त जगातीबाट खटिएको प्रहरी टोलीले चाँगुनारायण ९ ताथलीमा चेकजाँच गर्नेक्रममा सोहीस्थानबाट चोरी भएको बा. ८३ प. ७७७३ नम्बरको २२० सि.सी. को पल्सर सहित सोनाम र फुर्वालाई पक्राउ गर्न सफल भएकाे हाे ।
त्यसैगरी प्र. ३-०२-००८ प. ७५८५, र प्र. ३-०२-०१४ प.०५९४ नम्बरको २२० सि.सी.को पल्सर सहित थप २ जनालाई शुक्रवार मध्यान्हको समयमा सूर्यविनायकबाट नियन्त्रणमा लिई अनुसन्धान गर्दा चोरीको मोटरसाइकल चढेको पुष्टि भएको प्रहरीको भनाइ छ ।
पक्राउ परेका चारै जना उपर थप अनुसन्धान तथा कारवाही अघि बढाइएको प्रहरी निरीक्षक बुढाथोकीले बताए ।