भक्तपुर, ३ पुस भक्तपुरस्थित क्यान्सर अस्पताल विकास समितिको अध्यक्षमा डा दिपेन्द्ररमन सिंह नियुक्त भएका छन् । स्वास्थ्य सेवा विभागका महानिर्देशक डा. सिंहलाई सरकारले भक्तपुर क्यान्सर अस्पताल विकास समितिको अध्यक्ष बनाएको हो ।
पछिल्लो समय अस्पतालको व्यवस्थापनको बिबादमा हस्तक्षेप गर्दै सरकारले अस्पताल विकास समित मार्फत संघीय सरकार मातहत क्यान्सर अस्पताललाई संचालन गर्ने निर्णय गरेको थियो । एक गैरसरकारी संस्थाले सञ्चालन गर्दै आएकाे अस्पताल व्यवस्थापनले भ्रष्टाचार गरेको भन्दै भक्तपुर नगरपालिकाले छुट्टै व्यवस्थापन समिति गठन गरेपछि दुवैले काम गर्न सकेका थिएनन् ।
११ सदस्यीय अस्पताल बिकास समिति गठन आदेश स्वीकृत भएपनि समितिले पूर्णता भने पाएको छैन । समितिको सदस्य सचिवका रुपमा मन्त्रालयबाट आएका निर्देशक विष्णुदत्त पौडेलले जिम्मेवारी पाएका छन् भने सदस्यमा नीति तथा योजना महाशाखाका निर्देशक डा.गुणराज लोहनी र चिकित्सकका तर्फबाट डा. गणेश दंगाललाई नियुक्त गरिएको छ ।
समितिमा भक्तपुर नगरपालिका मेयर सुनिल प्रजापति पदेन सदस्य रहने छन् भने भक्तपुर अस्पतालकी मेडिकल सुपरिटेन्डेण्ट डा सुमित्रा गौतम पनि पदेन सदस्य रहने व्यवस्था छ।
अब क्यान्सर सोसाइटीको तर्फबाट ३ जना र समाजसेवीका तर्फबाट २ जना सदस्य नियुक्त हुन बाँकी रहेका बताइएको छ ।